OÉ-CUSSE, 05 Dezembru 2024 (TATOLI) – Abitante sira iha suku Bene-Ufe, sub-rejiaun Nítibe, husu ba Diresaun Rejionál Agrikultura, Rejiaun Administrativa Espesiál Oé-Cusse Ambeno (RAEOA) atu halo vasinasaun ba animál sira hanesan karau no manu, nune’e bele prevene husi moras.
Jestór sub-rejiaun Nítibe, Agustinho Afulit, hateten, dezde 2023, karau sira ladún hetan vasina, tanba ne’e husu atu halo vasinasaun iha kada trimestre.
“Iha períodu hira ona ami haree katak vasinasaun ba animál boot sira iha sub-rejiaun Nítibe ne’e paradu. Ami sujere ba oin tenke realiza tanba ida-ne’e di’ak ba animál nia saúde”, jestór ne’ levanta iha dialogu abertu ho Prezidente Autoridade RAEOA iha suku Bene-Ufe.
Notísia relevante: Populasaun Bene-Ufe aprezenta preokupasaun ba Rogério Lobato
Iha fatin hanesan, lia-na’in aldeia Manán, suku Bene-Ufe, António Neno, husu atu halo vasinasaun ba animál, tanba manu mate barak, enkuantu fahi no asu sira hetan ona vasinasaun.
Hatán ba rekomendasaun ne’e, Sekretária Rejionál ba Asuntu Agrikultura, Filomena Sila, promete, iha 2025, sei koloka tékniku pekuáriu bá iha sub-rejiaun sira, nune’e bele halo vasinasaun ba karau sira.
Notísia relevante: https://tatoli.tl/2022/03/01/pekuaria-raeoa-vasina-ona-karau-819/
“Kona-ba vasinasaun ba animál sira hanesan karau, foin daudaun ita prevee ona nia orsamentu iha 2025 no agora pasa ona, entaun tinan oin ita sei koloka tékniku sira husi pekuária atu destaka mai sub-rejiaun sira halo vasinasaun, tanba ita hatene katak ami foin simu knaar iha janeiru 2024, ne’ebé ami ezekuta de’it autoridade anteriór sira-nia programa no orsamentu”, dehan.
Jornalista: Abílio Elo Nini
Editora: Maria Auxiliadora
