OÉ-CUSSE, 05 Dezembru 2024 (TATOLI) – Prezidente Autoridade (RAEOA), Rogério Tiago Lobato, akompaña ho membru autoridade sira hala’o vizita, iha kuarta ne’e, bá populasaun sira iha suku Bene-Ufe, sub-rejiaun Nítibe, hodi hala’o diálogu abertu atu rona preokupasaun sira no distribui mós nesesidade bázika ba inan-aman sira-ne’ebé laiha kbiit no ba ema ho defisiénsia sira hamutuk 120.
“Ha’u mai iha ne’e, lori mensajen domin nian husi primeiru-ministru, tanba durante ne’e ami konsentra de’it iha Pante Makasar, entaun tenke mai atu rona preokupasaun, haree problema saida mak akontese iha Citrana atu imi relata sai buat ne’ebé akontese iha imi-nia suku, nune’e Governu bele konsidera. La’ós ne’e de’it, maibé ha’u mai ho ekipa ida depois ita haksolok hamutuk atu halo reflesaun ba Loron Proklamasaun 28 Novembru nian”, Rogério Lobato dehan iha Bene-Ufe.
Notísia relevante: Rogério Lobato halo diálogu ho komunidade iha Pássabe
Iha diálogu ne’e, Rogério Lobato promote sei halo vizita, iha 2025, bá suku idaidak no sei hela kle’ur hodi haree infraestrutura saida mak iha suku ne’e no saida mak presiza atu Governu fó tulun.
Jestór sub-rejiaun Nítibe, Agustinho Afulit, dehan ho prezensa prezidente autoridade bele rona direta lamentasaun komunidade nian, liuliu disputa rai iha Naktuka no problema infraestrutura bázika sira.
“Oportunidade ida ne’e ita-bele ko’alia ba malu, liuliu ba prosesu dezenvolvimentu, tanba ami iha Citrana mezmu besik tasi-ibun, maibé problema barak mak enfrenta, tan ne’e agradese ho prezensa ita-boot sira-nia bele haree rasik no rona direta preokupasaun husi komunidade”, dehan.
Notísia relevante: Jestór Nítibe husu autoridade RAEOA aselera konstrusaun estrada Noefefan-Oénunu
Sub-rejiaun Nítibe iha suku Ban-Afi, Lela-Ufe, Usitako, Suni-Ufe no Bene-Ufe ho totál aldeia hamutuk 17. “Suku haat seluk pertense ba foho, tan ne’e ohin ita hasoru direta ho komunidade Bene-Ufe. Tempu seluk mak ita-bele bá iha Nítibe parte foho, tanba mai iha ne’e ho distánsia dook”, nia salienta.

Iha biban ne’e, lia-na’in aldeia Manán, suku Bene-Ufe, António Neno, agradese ba prezidente autoridade tanba bele observa direta kondisaun moris komunidade iha Bene-Ufe.
“Ami hakarak de’it estrada. Ohin, ita haree rasik ho matan, molok to’o suku Bene-Ufe ita ultrapasa mota-boot tolu no mota-ki’ik barak. Ida-ne’e ami espera ba oin presiza rezolve ona”, nia hato’o.
Pedro Mauno husi aldeia Citrana, suku Bene-Ufe, dehan populasaun barak mak hela dook husi estrada boot no bainhira atu asesu bá postu saúde no eskola sira susar tebes, tanba hakat/ mota.

“Labarik sira tenke hakur mota-boot atu bá eskola, tanba ne’e ami husu sei bele mai atu observa direta. Ami agradese tanba bele ami to’o ami-nia fatin, ami husu labele besik kampaña mak ko’alia depois liu tiha haluha ami, ida-ne’e ami lakohi, tempu ukun tenke tun haree povu”, nia dehan.
Jornalista: Abílio Elo Nini
Editora: Maria Auxiliadora