OÉ-CUSSE, 07 Agostu 2024 (TATOLI) – Jestór sub-rejiaun Nítibe, Agustinho Afulit, husu ba autoridade Rejiaun Administrativa Espesiál Oé-Cusse Ambeno (RAEOA) atu aselera projetu konstrusaun estrada husi ponte Noefefan bá Oénunu, hafoin Ajénsia Dezenvolvimentu Nasionál (ADN) no Diresaun Rejionál Infraestrutura (DRI) deside hodi sobu tiha.
“Ha’u la’ós ema tékniku, maibé informasaun ne’ebé sai husi parte kompetente, liuliu ADN no DRI sira heteten katak estrada ne’ebé dada husi ponte Noefefan bá Oénunu la tuir padraun, ne’ebé ha’u espera bele kontinua”, Agustinho Afulit dehan.
Notísia relevante: ADN sobu ona projetu estrada husi ponte Noefefan-Oenunu
Dirijente ne’e haktuir katak maske estrada ne’e la prienxe kritéria tuir padraun la signifika katak autoridade anteriór la halo buat ida, maibé ida-ne’e mós falla téknika husi empreza ne’ebé hala’o obra ne’e, tanba liña koordenasaun ne’e dalaruma la másima mak hamosu kestaun referida, nune’e ema barak kestiona.
“Tan ne’e, ami sujere ba autoridade atuál kontinua karik haree nia BoQ tuir nia padraun, nune’e bele prienxe padraun Governu ne’ebé fó ona ba autoridade RAEOA atu ita-nia povu sira uza [estrada] ne’ebé kualidade no dura ba tempu ne’ebé naruk”, nia salienta.
Autoridade Nítibe ne’e fundamenta katak nu’udar liman-ain husi Estadu no Governu iha baze, apoia atu sobu hikas estrada husi ponte Noefefan to’o Oénunu ho distánsia kilómetru sia, nune’e bele hadi’ak liután, tanba iha futuru, estrada ne’e fó benefísiu direta ba povu iha suku lima iha sub-rejiaun Nítibe atu asesu bá merkadu.
“Ami mós akompaña, sira [empreza] sukat no aumenta tan husi ponte Noefefan bá to’o kapela suku Suni-Ufe nia oin, maibé momentu ne’ebá ami mós hatene no observa estrada ne’e la tuir padraun kuaze kilometru sia no ami espera katak bele kontinua”, nia espera.
Notísia relevante: Utilizasaun materiál ba konstrusaun estrada Noefefan-Oénunu la tuir BoQ
Jornalista Tatoli tenta konfirma asuntu ne’e ba Prezidente Autoridade RAEOA, Rogério Tiago Lobato, maibé laiha fatin tanba daudaun ne’e hala’o hela serbisu iha Díli.
Rekorde katak, konstrusaun estrada pakote primeiru husi Ponte Noefefan ba Oénunu, sub-rejiaun Nítibe, autoridade RAEOA hatuur ona fatuk dahuluk iha 19 Agostu 2022.
Projetu ne’e empreza estatál Indonézia PT.Waskita Karya mak ezekuta ho valór orsamentu millaun $23. Autoridade RAEOA aloka verba iha Orsamentu Jerál Estadu 2022 nian ho distánsia kilómetru 11.
Notísia relevante: ADN orienta Waskita Karya sobu estrada kilómetru 9,5 iha Nítibe-Oésilo
Jornalista: Abílio Elo Nini
Editora: Maria Auxiliadora
