OÉ-CUSSE, 23 Jullu 2024 (TATOLI) – Ajénsia Dezenvovimentu Nasionál, Intitutu Públiku (ADN, I.P) lamenta ho materiál sira-ne’ebé empreza estatál Indonézia, PT.Waskita Karya, uza hodi halo estrada husi ponte Noefefan ba Oénunu tanba la tuir padraun Bill of Quantity (BoQ).
“Ohin, ita hahú sobu estrada husi Noefefan ba Oénunu, tanba materiál la tuir espesifikasaun. Ita sei la rekoñese materiál ne’ebé sira halibúr barak tebes iha ne’e atu mai nahe. ADN rejeita totálmente materiál ne’e, entaun sira [empreza] tenke prodús fali materiál foun”, Diretór-Ezkutivu ADN, Rui Lourenço da Costa, informa iha Oé-Cusse.
Nia salienta katak molok empreza atu halo serbisu ida ne’e tenke hato’o uluk ba ADN no sei koopera ho Diresaun Rejionál Infraestrutura (DRI) atu halo teste laboratóriu, kuandu aseita ona mak foin sira bele prodús foun, nune’e bele nahe kilómetru sia (9) ne’ebé sei sobu.
Notísia relevante: ADN sobu ona projetu estrada husi ponte Noefefan-Oenunu
“Ita la’ós mai atu haree de’it estrada ida-ne’e, maibé mai atu kontrola projetu sira-ne’ebé halo iha Oé-Cusse, nune’e povu nia osan uza ho di’ak”, nia afirma.
Hatán kona-ba materiál sira la tuir padraun, Jestór PT.Waskita Karya, Aris Sitomo, admite no simu ona karta ofisiál husi Diresaun Rejionál Infraestrutura hodi diskute kona-ba materiál sira.
“Ami rekoñese katak, iha loron 25 juñu 2024 ne’e, iha pakote I no II, ami levanta ona asuntu materiál nian, to’o loron 1 Jullu husi parte Diresaun Rejionál Infraestrutura hato’o ona karta mai ami, ne’ebé daudaun ne’e ami hein desizaun husi ADN atu mai akompaña ami bainhira iha ona materiál, nune’e ba oin ita labele diskute ona ba materiál sira”, nia realsa.
Entretantu, progresu konstrusaun fizika ba estrada pakote I husi Ponte Noefefan liga ba Oénunu daudaun ne’e atinje ona 55% no pakote II husi Tono ba Oésilo atinje 23%.
Lembra katak projetu konstrusaun estrada pakote I husi ponte Noefefan bá Oénunu, sub-rejiaun Nítibe, konstrui husi Waskita Karya ho distánsia kilómetru 11 ho montante millaun $23. Autoridade RAEOA hatuur fatuk dahuluk ba estrada ne’e iha loron 19 Agostu 2022.
Ba estrada pakote II husi Tono, suku Cunha, bá sub-rejiaun Oésilo, ho distánsia kilómetru 18 ho osan millaun $33,9. Autoridade hatuur fatuk dahuluk iha loron 16 Maiu 2023.
Notísia relevante: ADN orienta Waskita Karya sobu estrada kilómetru 9,5 iha Nítibe-Oésilo
Jornalista: Abílio Elo Nini
Editora: Maria Auxiliadora
