OÉ-CUSSE 22 jullu 2024 (TATOLI) – Governu liuhusi Ministériu Planeamentu no Investimentu Estratéjiku (MPIE) akompaña husi Ajénsia Dezenvolvimentu Nasionál (ADN) hamutuk ho Autoridade Rejiaun Administrativa Espesiál Oé-Cusse Ambeno (RAEOA), segunda ne’e orienta ona kompañia estatál PT.Waskita Karya sobu hikas projetu estrada kilómentru neen (6) inklui asfáltika kilómetru tolu husi ponte Noefefan liga ba Oenunu.
Diretór Ezkutivu ADN, Rui Lourenço da Costa, hateten, kompaña Waskita Karya tenke sobu fali estrada kilómtru 9,3 iha estrada pakote I husi ponte Noefefan, sub-rejiaun Pante Makasar ba Oénunu, sub-rejiaun Nítibe sobu kilómetru neen (6) inklui ásfaltika kilómetru tolu (3), no pakote II husi Tono ba sub-rejiaun Oésilo sobu kilómetru 3.
“Ohin ita simbolika sobu husi Ponte Noefefan ba Oenunu ho kilómetru 11 ho valór kontratu millaun $22, ita agradese ba Governu liuliu MPIE ohin akompaña ami,” Rui Lourenço da Costa, informa ba jornalista sira.
Notísia relevante:ADN orienta Waskita Karya sobu estrada kilómetru 9,5 iha Nítibe-Oésilo
Kompaña Waskita Karya hahú sobu uluk, iha estrada diresaun natar Kolomboe Ana pertense suku Lifau nian sei kontinua ba suku Taiboko, inklui sobu estrada hane alkatroda kilómetru tolu.
“Ita sobu kilómetru neen (6) baze course, kamada ida-ne’ebé molok ita nahe alkatroada, tanba tuir loloos nia espesifikasaun tenke bazea ba materiál ne’ebé mak prodús, materiál ne’e mak uza iha ne’e tenke liuhusi kruser, agora ida-ne’e ita deskobre katak, materiál ne’e maioria forte la direitamente husi mota, ba liu hanesan piñeira, balu la liu, depois kahur de’it lori mai nahe, iha kilómetru tolu (3) nahe ona alkatroada, hamutuk kilómetru 9 mak sei sobu,” nia dehan.
Tuir nia, kona-bá projetu estrada Tono ba Oésilo, kuaze hanesan deskobre katak nia baze course, materiál ne’ebé la tuir espesifikasaun maske atu hahú nahe ona alkatroda, maibé ADN husu atu hamutuk prodús fila-fali materiál baze course mak foin bele nahe alkatroda.
Notísia relevante: Rogério Lobato preokupa projetu estrada Tono ba Oésilo gasta millaun 33-resin
Diretór Infraestrutura RAEOA, Remígio Nuno Sila, informa, antes ne’e ekipa tékniku husi ADN no DRI halo teste ba materiál sira iha laboratóriu nasionál, hatudu kompaña la kumpre padraun espesifikasaun.
“Antes ita foti ona sampel ba konstrusaun estrada ne’e, depois materiál sira-ne’e lori ba teste laboratóriu iha nasionál, iha materiál barak maibé deteta materiál baze course mak latuir padraun espesifisikasaun iha kilómetru neen (6) no kilómetru tolu (3) mak nahe ona alkatroada entaun base course ne’e, tenke hasai husi parte Waskita Karya, nune’e bele kontinua ba futuru ho kualidade,” nia hateten.
Jestór PT.Waskita Karya, Aris Sitomo, fó-sai progresu fíziku ba estrada Ponte Noefefan ba Oenunu atinje ona 55%, no pakote II husi Tono ba Oésilo dadaun ne’e atinje ona 23%.
“Antes ne’e ami hetan ona verifikasaun husi DRI no ADN durante loron 15, ami kumpre prosesu ne’e, ne’e mak ohin sobu daudaun, ita koopera no ami sei kontinua diskusaun ba oin, ohin Ministru MPIE mós informa, irregularidade ne’e presiza buka solusaun, tán ne’e ohin hahú sobu uluk pakote I depois mak ita sei halo diskusaun ba prosesu kontinuasaun,” nia dehan.
Notísia relevante:Estrada Noefefan-Nítibe hahú prosesu pavimentasaun asfáltika
Rekorda fali katak, estrada pakote primeiru husi Ponte Noefefan ba Oénunu, sub-rejiaun Nítibe, Autoridade RAEOA hatuur fatuk dahuluk iha loron 19 agostu 2022, no kompañia Waskita Karya ezekuta ho distánsia kilómetru 11 ho montante millaun $23.
Nune’e mós estrada pakote daruak husi Tono, suku Cunha, ba sub-rejiaun Oésilo, Autoridade RAEOA hatuur fatuk dahuluk iha loron 16 maiu 2023, Waskita Karya ezekuta ho distánsia kilómetru 18 ho millaun $33-resin ($33,915,000.00).
Notísia relevante: Autoridade RAEOA seidauk selu projetu estrada Nítibe-Oésilo
Jornalista: Abílio Elo Nini
Editora: Evaristo Soares Martins