OÉ-CUSSE 07 outubru 2023 (TATOLI)—Estrada hosi Ponte Noefefan sub-rejiaun Makasar liga ba Oénunu sub-rejiaun Nítibe, sábadu ne’e, hahú halo pavimentasaun asfáltika, hahú uluk hosi aldeia Maquelab, suku Taiboko mai suku Lifau ho distánsia kilómetru hitu.
Prezidente Autoridade Rejiaun Administrativa Oé-cusse Ambeno (RAEOA), Arsénio Paixão Bano, akompaña ho tékniku sira hosi Diresaun Rejionál Infraestrura, observa prosesu ne’e iha terrenu.
“Ita halo estrada nasionál, ita mai ho tékniku sira mai haree atu garante katak alkatraun ne’e kualidade iha, mínimu tenkne ho grau 130 to’o 180, ho nia primeiru layer ne’e tau alkatraun séntimu neen no layer kedua ne’e séntimu haat, ne’ebé hamutuk séntimu 10. Ita tenki garante katak estrada ne’e tenke iha kualidade,” Arsénio Bano, hateten ba Agência Tatoli, hafoin akompaña atividade iha suku Taiboko.
Estrada nasionál ne’e hanesan pakote dahuluk ho distánsia kilómetru 11, hahú hosi ponte Noefefan, suku Lifau inklui suku Taiboko to’o Oénunu, suku Suni-Ufe sub-rejiaun Nítibe.
Notísia relevante: Projetu estrada nasionál hosi Pante Makasar ba Nítibe atinje 46%
Nia dehan, estrada ne’e tenke di’ak ho ponte sira hamutuk lima, nune’e bainhira buat hotu la’o di’ak no lais, maka kada loron empreza responsável ezekuta mínimu metru 200.
“Ita hakarak halo kualidade, tanba ne’e ita-nia tékniku sira sei mai observa hori konfirma, aspal ne’e ho kualidade di’ak, sira halo pavimentasaun ne’e di’ak, ita bele asegura katak estrada ne’e bele dura ba tinan naruk, entaun ha’u espera katak empreza kuandu ita mai beibeik haree, ita-nia fiskalizasaun ne’e sira sei halo ho kualidade,” nia tenik.
Nune’e mós, Jestór projetu PT Waskita Karya, Jajan Asfarin, informa, empreza iha kompromisu ho termu kontratu no garante kualidade tanba durante ezekusaun projetu ne’e hetan akompañamentu direita hosi konsultór sira.
“Bainhira ita ezekuta projetu ne’e, hetan akompaña hosi konsultór profico, ne’ebé kuandu ita atu ezekuta serbisu ida, tenke husu autorizasaun hosi sira, hafoin atu halo serbisu kontinuasaun, entaun serbisu tomak sei la’o ho prosesu atu garante nia kualidade, ita espera katak serbisu ne’e bele lais, tanba komunidade hein kleur ona atu uza,” nia katak.
Notísia relevante: Estrada nasionál Pante Makasar-Nítibe sei kompleta ho ponte lima
Autoridade RAEOA iha loron 19 agostu 2022 halo lansamentu projetu estrada ho distánsia kilómetru 11, hanesan pakote I, hahú hosi ponte Noefefan suku Lifau, inklui suku Taiboko sub-rejiaun Pante Makasar to’o Oénunu suku Suni-Ufe sub-rejiaun Nítibe.
Projetu realibitasaun estrada nasionál responsabiliza hosi empreza estatál Indonézia PT. Waskita Karya, ho valór kontratu millaun $23, ne’ebé Autoridade RAEOA prevee hosi Orsamentu Jerál Estadu (OJE) 2022 ho durasaun serbisu fulan-18.
Jornalista : Abílio Elo Nini
Editora : Julia Chatarina
