iklan

EKONOMIA, HEADLINE, MUNISÍPIU, OÉ-CUSSE (RAEOA)

Rogério Lobato preokupa projetu estrada Tono ba Oésilo gasta millaun 33-resin

Rogério Lobato preokupa projetu estrada Tono ba Oésilo gasta millaun 33-resin

Autoridade hala’o serimónia Kulturál molok ezekuta estrada nasionál Tono ba Oésilo. Imajen Tatoli/ Abílio Elo Nini.

OÉ-CUSSE, 24 maiu 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, preokupa ho projetu estrada husi eis merkadu Tono, suku Cunha, sub-rejiaun Pante Makasar liga ba sub-rejiaun Oésilo bootliu, tanba ho kilómetru 17 maibé gasta millaun $33-resin.

Tan ne’e, Autoridade másimu ne’e, sei konsulta ho Primeiru Ministru, kona-bá prosesu pagamentu, tanba projetu estrada ne’e, daudaun nia progresu fíziku atinje ona 20%.

“Estrada husi Tono ba Oésilo, ne’e estrada ida ho presu boot tebes, estrada ne’e ladún naruk, nia distánsia kilómetru 17 de’it maibé osan ne’ebé sira asina iha kontratu ne’e millaun $33,” Rogério Lobato ba jornalista sira iha Oé-Cusse.

Notísia relevante: Komisaun E fiskaliza projetu iha Oé-Cusse kona-ba kustu no rekizitu

Nia informa, osan millaun $33 ne’e, signifika, kilometru ida tenki gasta osan besik millaun $1,700, ida-ne’e tuir regra labele akontese, tanba ne’e estrada rurál másimu mak kilómetru ida bele gasta millaun $1.

“Entaun ami haree situasaun ne’e, ADN haree ona, halo ona rekomendasaun, ha’u sei konsulta ho Primeiru Ministru, tanba RAEOA tutela direita, atu oinsá halo pagamentu tuir regra ne’ebé iha, no agora nia progresu foin mak atinje 20%,” nia hateten.

Notísia relevante:Waskita Karya sei ezekuta projetu estrada nasionál Pante Makasar-Oésilo ho millaun $33-resin

Entretantu, estrada ne’e autoridade sesante hatuur fatuk dahuluk iha loron 16 maiu 2023, ezekuta husi kompania estatál PT Waskita Karya, hahú hosi eis merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo.

Valór kontratu ba projetu ne’e hamutuk $33,915,000.00,  orsamentu ne’e  Autoridade RAEOA prevee hosi Orsamentu Jerál Estadu (OJE) 2023 nian, ho durasaun servisu durante tinan rua.

Notísia relevante: Autoridade RAEOA hatuur fatuk dahuluk ba projetu estrada Pante Makasar-Oésilo

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!