OÉ-CUSSE, 16 maiu 2023 (TATOLI) – Autoridade Rejiaun Administrativa Espesiál Oé-Cusse Oé-Cusse Ambeno (RAEOA), tersa ne’e hatuur fatuk dahuluk ba projetu reabilitasaun estrada nasionál hosi sub-rejiaun Pante Makasar liga ba sub-rejiaun Oésilo ho distánsia kilómetru 18.
Serimónia hatuur fatuk dahuluk ne’e, realiza iha aldeia Oébaha, suku Bobometo, sub-rejiaun Oesilo.
Notísia relevante: Aban, PM Taur hatuur fatuk dahuluk ba projetu estrada Pante Makasar-Oésilo
Prezidente Autoridade RAEOA, Arsénio Paixão Bano, agradese ba Governu Sentrál liuhosi Parlamentu nasionál (PN) tanba konsege aprova orsamentu ba projetu estrada nasionál Tono, Oésilo, no projetu rasik sei envolve komunidade hodi serbisu iha prosesu implementasaun.
“Ohin loron importante ba Oé-Cusse no importante ba Timor-Leste, hanesan Prezidente Autoridade agradese Governu Sentrál ba parlamentár sira, tanba aprova orsamentu ba projetu estrada Pante Makasar ba Oésilo,” Arsénio Paixão Bano, ko’alia iha ámbitu hatuur fatuk dahuluk.
Tuir nia, projetu ne’e importante ba RAEOA, tanba iha mandatu Prezidente Autoridade dahuluk, bainhira lidera RAEOA ho ZEESM, estrada ne’e tama ona pakote ida importante, estudu halo tinan barak ona hodi ekipa tékniku sira, to’o momentu lansa duni estrada nasionál ne’e.
“Estrada ne’e sei fó benefísiu boot ba RAEOA, la’ós de’it mellora asesu estrada ba Oésilo Pante Makasar, maibé sei fó serbisu ba ema barak, kompañia sub-kontratór barak sei hetan serbisu,” nia fó hanoin.
Notísia relevante: Waskita Karya sei ezekuta projetu estrada nasionál Pante Makasar-Oésilo ho millaun $33-resin
Arsénio Bano, fó hanoin ba komunidade sira-ne’ebé pertense suku Bobokase, Naimeko no Bobometo atu kontribui iha prosesu levantamentu prosesu ba dezenvolvimentu, tanba autoridade sei fó solusaun ba patrimóniu komunidade bainhira hetan afetasaun.
“Ita sei deskuti ho inan-aman sira, karik imi-nia to’os, natar, ai-horis hetan afeita iha projetu ne’e, autoridade sei aprosima mekanizmu selu kompensasaun ne’e oinsá, maibé polítika Autoridade prevee ona nia orsamentu, katak uma troka uma, rai troka rai inklui plantasaun, bee-moos sei fasilita kompensasaun, maibé importante kontribui serbisu hamutuk ho kompañia, atu projetu ne’e bele la’o tuir kontratu,” nia fó hanoin.
Diretór Operasionál PT. Waskita Karya, Ketut Pasek Senjaya, promete sei ezekuta konstrusaun ne’e bazea komitmentu no kapsidade hodi garante kualidade no kumpri termu kontratu ne’ebé estabelese ona .
“Inan-aman sira iha Oé-Cusse, ohin notísia di’ak kontente ba ita hotu, tanba ohin ita bele hahú inísia projetu nasinál ida iha Timor-Leste espesialmente iha Oé-Cusse, hodi liga sidade ba sub-rejiaun no suku, projetu ne’e kleur ona ita hein, tanba nia benefísiu ba konetividade komunidade atu asesu ba merkadu,” nia orgullu.
Nia fundamenta, Waskita Karya nu’udar kompañia konstrusaun boot iha Indonézia, iha komitmentu no esperansa hakarak kontribui dezenvolve infraestrutura sira, hosi aeroportu, portu, estrada sira iha Timor-Leste liu-lliu iha O’e-Cusse.
“Tán ne’e atu atinje nesesidade ekipamentu, sub-kontratór, Waskita Karya iha komitmentu atu buka sasán ne’ebé di’akliu, bazea espesifikasaun, ekipamentu ne’ebé mai tuir tempu no prontu atu uza, ami promete sei garante kualidade no kumpri termu kontratu ne’ebé estabelese ona,” nia katak.
Kompania Internasionál PT Waskita Karya, ezekuta projetu estrada nasionál ne’e Sei hahú hosi eis merkadu Tono, suku Cunha, sub-rejiaun Pante Makasar to’o fronteira Napan, suku Bobometo, sub-rejiaun Oésilo.
Valór kontratu projetu ne’e hamutuk millaun $33,915,000.00, orsamentu ne’e Autoridade RAEOA prevee hosi Orsamentu Jerál Estadu (OJE) 2023 nian, ho durasaun serbisu durante tinan rua.
Notísia relevante: Autoridade RAEOA hatuur fatuk dahuluk ba projetu ponte Bitopa
Jornalista: Abílio Elo Nini
Editór: Evaristo Soares Martins
