OÉ-CUSSE, 29 maiu 2024 (TATOLI) – Ajénsia Dezenvolvimentu Nasionál, Instituutu Públiku (ADN,IP), orienta empreza estatál Indonézia, PT Waskita Karya, atu sobu fali estrada kilómetru 9,5 husi Ponte Noefefan liga ba Oénunu sub-rejiaun Nítibe no husi Tono liga ba sub-rejiaun Oésilo, iha Rejiaun Administrativa Espesiál Oé-Cusse Ambeno (RAEOA), tanba kompañia la kumpre materiál espesifikasaun padraun kualidade nian.
Notísia relevante: DRI no ADN fiskaliza uluk projetu 183 molok halo pagamentu
Diretór Ezekutivu ADN, Rui Lourenço da Costa, fó orientasaun ne’e, hafoin enkontru koordenasaun ho jestór kompañia no tékniku kompañia Waskita Karya iha Diresaun Rejionál Infraestrutura Oé-Cusse, kuarta ne’e.
Nia hateten, estrada pakote dahuluk husi Ponte Noefefan ba Oénunu, sei hasai (sobu) kilómetru neen (6) no pakote daruak husi Tono ba Oésilo sei hasai kilómetru 3,5.
“Reuniaun ohin remata ho konkluzaun ida pozitivu, tanba iha konstrusaun estrada ne’e, iha kamada haat kedas, primeiru materiál embazementu, segundu sub-baze, terseiru mak base course ikus mak nahe alkatroada. Ne’e duni, iha kamada besik nahe alkatroada ne’e base course, mak ADN deskobre katak, sira la uza materiál estandar (padraun) no espesifikasaun ne’ebé vigora iha Timor-Leste,” Rui Lourenço da Costa hateten.
Nia hatutan, Waskita Karya utiliza de’it 30% agregadu ne’ebé mákina sira fera, restante ne’e uza de’it rai-henek, entaun ida-ne’e la aseita tanba base course materiál sira-ne’e, tenki 100% prodús husi estoke rasik, entaun haree ba rezultadu analiza laboratóriu, ne’e la tama.
“Liga ho ida-ne’e, kompañia tenke hasai (sobu), tuir rekomendasaun husi ekipa laboratóriu tenki hasai, klaru maske balu nahe tiha ona alkatroada maibé tenki hasai hotu, sei sira lakoi hasai, Governu sei la selu,” nia afirma.
Notísia relevante: Rogério Lobato preokupa projetu estrada Tono ba Oésilo gasta millaun 33-resin
Diretór Ezekutivu ADN ne’e, orgullu tanba parte kompañia kumpre no kolabora ho Diresaun Obra Públika, nune’e konkluzaun ikus katak, parte rua Waskita Karya ho tékniku ADN iha ona konkordánsia atu hasai materiál kamada ne’ebé refere sai problema iha estrada rua ne’e.
Maibé bainhira hasai, molok atu kontinua fali estrada sira-ne’e, parte rua sei ba halo ezersisíu amostra (sampel) foun, depois submete fali ba laboratóriu obra públika no ADN hodi teste fila-fali hodi kumpre kritériu espesifikasaun, mak kontinua kedas pavimentasaun asfáltika.
“Ida-ne’e mak ami apresia tebes ho Waskita Karya nia kooperasaun no intendimentu tanba fasil iha diskusaun tékniku parte rua, ne’ebé ekipa tékniku husi ADN sei koopera ho DRI no serbisu hamutuk ho Waskita Karya, koordena hodi hasai tiha materiál ne’ebé laloos,” nia katak.
Diretór Rejionál Infraestrutura, Remígio Nuno Sila, agradese ho prezensa ADN tanba antes ne’e pedidu husi Prezidente Autoridade katak, husu ADN nia prezensa iha Oé-Cusse, atu oinsa bele akompaña verifikasaun no inspesaun ba projetu sira hotu iha Oé-Cusse,
“Iha estrada pakote primeiru Ponte Noefefan ba Oénunu nia progresu fíziku daudaun ne’e atinje ona 41% , no autoridade halo ona pagamentu 54%, maibé ita selu ona millaun $10, no pakote daruak, husi Tono ba Oésilo atinje ona 20%, sei halo mós pagamentu,” nia katak.
Jornalista Ajénsia Tatoli tenta konfirma asuntu ne’e ho tékniku sira husi kompañia Waskita Karya, maibé rezeita fó komentáriu, tanba sei iha desizaun koletiva husi jestór sira iha kompañia.
Notísia relevante: Autoridade RAEOA seidauk selu projetu estrada Nítibe-Oésilo
Rekorda fali katak, estrada pakote primeiru husi Ponte Noefefan ba Oénunu, sub-rejiaun Nítibe, Autoridade RAEOA hatuur fatuk dahuluk iha loron 19 agostu 2022, no kompañia Waskita Karya ezekuta ho distánsia kilómetru 11 ho montante millaun $23.
Nune’e mós estrada pakote daruak husi Tono, suku Cunha, ba sub-rejiaun Oésilo, Autoridade RAEOA hatuur fatuk dahuluk iha loron 16 maiu 2023, Waskita Karya ezekuta ho distánsia kilometru 18 ho millaun $33-resin ($33,915,000.00).
Jornalista: Abílio Elo Nini
Editór: Evaristo Soares Martins
