iklan

HEADLINE, OÉ-CUSSE (RAEOA)

DRI no ADN fiskaliza uluk projetu 183 molok halo pagamentu

DRI no ADN fiskaliza uluk projetu 183 molok halo pagamentu

Diretór foun Rejionál Infraestrutura, Remígio Nuno Sila, hala'o observasaun bá sentrál elétrika Sakato. Imajen/Mídia Sekretaria Finansa.

OÉ-CUSSE, 24 Abríl 2024 (TATOLI) –  Diresaun Rejionál Infraestrutura (DRI) no Ajénsia Dezenvolvimentu Nasionál, Institutu Públiku (ADN, IP) sei fiskaliza projetu 183 ne’ebé Autoridade Rejiaun Administrativa Espesiál Oé-Cusse Ambeno (RAEOA) anteriór konstrui iha 2023 hafoin halo pagamentu.

Diretór Rejionál Infraestrutura Oé-Cusse, Remígio Nuno Sila, hateten projetu sira-ne’e mai husi Sekretaria Rejionál ba Asuntu Saúde iha11, ba Asuntu Terra no Propriedade 16 no ba Asuntu Edukasaun no Solidariedade Sosiál 38.

Nune’e mós ba Asuntu Finansa iha projetu ida, ba Asuntu Administrasaun hitu, ba Asuntu Komérsiu no Indústria haat, ba Asuntu Agrikultura 32 no Gabinete Prezidente Autoridade RAEOA 74.

“Ha’u simu ona dokumentu husi Sekretária Rejionál Finansa katak iha projetu 183 mak sei finaliza iha tinan ne’e. Empreza barak mai ona iha ha’u-nia fatin, husu tuir kona-ba prosesu pagamentu. Ha’u deklara ona ba sira katak, ha’u seidauk hetan oriéntasaun husi Prezidente Autoridade kona-ba pagamentu”, Remígio Sila informa iha Oé-Cusse, ohin.

Notísia relevante: RAEOA propoin millaun $93 iha tetu OJE 2024 atu konklui projetu 99

Tuir planu DRI, iha trimestre daruak, ekipa téknika husi AND no DRI sei konfirma projetu hotu iha kada setór, nune’e bele akumula hotu dadus, progresu serbisu, no termu kontratu ba prosesu pagamentu nian.

“Iha tempu badak ami sei hamutuk ho ADN halo fiskalizasaun no verifika projetu sira hotu, ne’ebé harii iha 2023 no seidauk finlaiza. Halo monitorizasaun konjunta ba kondisaun no progresu fíziku iha terrenu, dokumentu kontratu, depois aprezenta ba Prezidente Autoridade mak foin bele hetan orientasaun kona-ba pagamentu”, nia esplika.

Orsamentu Jerál Estadu 2024 ba RAEOA hamutuk millaun $60, husi totál ne’e millaun $40 ba RAEOA no $20 ba Fundu Espesiál Dezenvolvimentu (FED).

Iha tinan kotuk, RAEOA nia orsamentu hamutuk millaun $120, ne’ebé dezagrega ba RAEOA millaun $84 no FED millaun $36.

Notísia relevante: Autoridade RAEOA seidauk selu projetu estrada Nítibe-Oésilo

Jornalista: Abílio Elo Nini

Editora: Maria Auxiliadora

iklan
iklan

Leave a Reply

iklan
error: Content is protected !!