OÉ-CUSSE, 05 Dezembru 2024 (TATOLI) – Dezde ukun-aan, família 77 iha bairru Naktuka, seidauk asesu liña eletrisidade, informa delegada aldeia Lamasin, suku Bene-Ufe sub-rejiaun Nítibe, Rejiaun Administrativa Espesiál Oé-Cusse Ambeno (RAEOA), Rud Sila.
“Ami iha bairru Naktuka susar tebes ba ahi, dezde ita ukun-aan ahi seidauk tama. Kuandu iha lia-mate ruma, ami uza de’it lampra boot”, delegada ne’e aprezenta iha ámbitu diálogu abertu ho Prezidente Autoridade RAEOA, Rogério Lobato, iha postu saúde Manan, kuarta ne’e.
Tanba ne’e, nia husu ba autoridade RAEOA atu apoia netik painél solar, bainhira liña eletrisidade seidauk tama iha Naktuka.
Aleinde bairru Naktuka, Jestór sub-rejiaun Nítibe, Agustinho Afulit, mós aprezenta katak iha uma-kain 21 iha bairru izoladu Bi-Ele mós la asesu eletrisidade no painél solar ne’ebé uluk Governu apoia balun aat ona.
“Eletrisidade iha Nítibe kobre ona suku lima, maibé iha fatin izoladu, liuliu uma-adat sira barak mak seidauk iha. Ami sujere ba oin apoia nafatin painél solár ba uma-kain sira-ne’ebé hela dook husi estrada hanesan Bi-Ele iha uma-kain 21. Uluk sira hetan [painél solár] maibé balun aat ona, tanba laiha manutensaun”, nia rekomenda.
Hatán ba sujestaun sira-ne’e, Prezidente Autoridade RAEOA, Rogério Tiago Lobato, konsidera importante tanba sidadaun hotu iha direitu atu asesu ba liña eletrisidade.
“Imi hakerek karta pedidu ida ba Sekretáriu Rejionál Administrasaun atu hato’o mai ha’u, tanba suku sira tutela direita ba. Ne’ebé ohin ha’u rona ona, ba oin ha’u presiza dokumentu ida hato’o mai para osan iha karik ita-bele rezolve, tanba ema balun asesu ona, tanba saida mak imi seidauk asesu? Imi iha direitu atu asesu, ita tenke haree ida-ne’e”, nia afirma.
Tuir Sensu Uma-kain 2022, suku Bene-Ufe akumula família 640 ho totál populasaun 3.164, ne’ebé mai husi aldeia manán, Lamasin no Citrana.
Notísia relevante: Komunidade Bene-Ufe husu hapara konstrusaun UPF Citrana
Jornalista: Abílio Elo Nini
Editora: Maria Auxiliadora
