BOBONARO, 06 dezembru 2024 (TATOLI) – Komdante Interinu Autoridade Protesaun Sivíl (APC, sigla portugés) Munisípiu Bobonaro, Eugebio Fernandes da Cruz, hateten durante ne’e tempu udan sempre akontese inundasaun iha suku Purugua, postu administrativu Cailaco, tanba laiha barrajen atu satan volume bee sulin husi mota.
Eugebio informa, tinan-tinan sempre akontese inundasaun no iha fulan kotuk liubá mós akontese tan ne’ebé rezulta Uma-kain 14 mak estragus liuliu sira ne’ebé hela iha parte mota-ninin.
Notísia relevante: Administradór Cailaco husu IGE normaliza mota Purugua
“Suku Purugua ne’e risku ba inundasaun iha tempu udan, ida-ne’e bainbain, tinan-tinan bee sa’e, tanba komunidade balu hela iha mota-laran kedas, se sira agora udan boot mai sei nafatin akontese indundasaun, tanba komunidade nia uma mak iha fatin ne’e duni, karik husi parte Obra Públika halo netik penahan ne’e bele satan netik sira,” nia informa ba Jornalista sira,la iha Maliana, sesta ne’e.
Nia dehan, bainhira udan boot akontese tan indundasaun,vekipa APC preparadu no prontu 24 oras atu halo intervensaun hodi evakua komunidade ba fatin seguru no salva rikusoin sira.
Sorin seluk, Xefe suku Purugua, Januario Bere Mau,vrelata provizoriumente situasaun atuál seguru no kontroladu hela, tanba ekipamentu pezadu husi kompañia balu apoia hela hodi halo intervensaun.
Kada tinan suku Purugua sempre afetadu ba inundasaun no problema ne’e hato’o beibeik ona ba autoridade postu no munisípiu atu koordena ho governu hodi halo intervensaun ruma, maibé to’o agora laiha rezultadu.
“Sira obra mai ami halo identifikasaun, sosializasaun ba komunidade, sira koopera fó ona rai-natar atu dudu sa’e ba mota, ami halo akordu hotu tiha mas to’o agora laiha rezultadu to’o agora, ne’ebé ha’u rekomenda ba governu sé bele ita tau prioridade,” nia fó hanoin.
Ho situasaun ne’e, Xefe suku Januario sente triste tanba mota iha fatin tolu mak fó ameasa ba komunidade nia uma no infraestrutura eskola inklui natar.
Nia hatutan, implementasaun projetu barrajen mota ne’ebé daudaun ne’e Kompañia Ely Karya ezekuta ne’e mós labele halo prevensaun tanba konstrui iha fali parte suku Purugua nia.
“Iha aldeia Lesupu nia ne’e la halo ida, ne’ebé ha‘u-nia suku Purugua ne’e nafatin risku, la’ós foin akontese agora, maibé dalabarak ona, mota ida Purugua ne’e kuandu udan no risku boot ba komunidade. Sé ita la halo prevensaun ho emerjénsiansia,” nia hateten.
Enkuantu suku Purugua iha aldeia rua hansan Lesupu no Heda ho totál populasaun tuir dadus 2022 hamutuk na’in 1,100-resin.
Notísia relevante: PAM Bobonaro lansa projetu barrajen iha mota Maumela
Jornalista: Sérgio da Cruz
Editór: Evaristo Soares Martins
