EKONOMIA, BOBONARO, HEADLINE, MUNISÍPIU

PAM Bobonaro lansa projetu barrajen iha mota Maumela

PAM Bobonaro lansa projetu barrajen iha mota Maumela

Prezidente Autoridade munisipál Bobonaro, Alexandrino Pires, hatuur fatuk dahuluk ba projetu konstrusaun Barrajen iha mota Maumela I, suku Atudara, postu administrativu Cailaco. Imajen Tatoli/Sérgio da Cruz.

BOBONARO, 21 maiu 2024 (TATOLI)-Prezidente Autoridade Munisipál (PAM) Bobonaro, Alexandrino Pires, akompaña husi Sekretáriu Autoridade Munisipál ba Asuntu Planeamentu no dezenvolvimentu Investimentu Integradu, Semedo Laco, hamutuk ho diretór servisu munisipál sira, tersa ne’e halo lansamentu ba projetu barrajen satan mota Memela I, suku Atudara, postu administrativu Cailaco ho distánsia metru 800.

Autoridade Munisipál Bobonaro implementa obra ne’e liuhusi projetu Programa Dezenvolvimentu Integradu Munisipál (PDIM) tinan 2024, tanba tinan-tinan bainhira komunidade sira sempre afetadu husi inundasaun.

Notisia Relevante:Autoridade Bobonaro sei implementa projetu PDIM 13

“Ita ohin liu ba mai haree iha afetadu ba komunidade sira, sede suku, kapela mós ba hotu, entaun objetivu husi ita lansamentu ba projetu ne’e atu satan netik mota labele fo estragus ba komunidade nia uma, sede suku, kapela no eskola,” nia hateten.

Líder másimu munisípiu Bobonaro ne’e mós apela ba komunidade sira atu koopera no kolabora ho empreza konstrutora, nune’e obra ne’e bele finaliza ho kualidade no tuir kontratu servisu.

Alende ne’e husu mós ba komunidade atu labele tesi ai arbiru iha mota ninin.

“Ita kuandu tesi-arbiru mak ne’e to’o tempu udan, mota mai estraga buat hotu-hotu, animál sira sai fundu ba ita atu fó eskola ba oan sira,” nia fó hanoin.

Komunidade Atudara, Felicidade Soares, senti kontenti no agradese ba governu lokál ne’ebé konsege implementa obra ne’e.

“Durante ne’e bee tama ami-nia uma arbiru de’it, estraga ami-nia to’os, natar, lori mós ami nia animál hakiak, tempu udan ne’e ami la hakmatek,” nia informa.

Sorin seluk, Diretór Komapañia Ely Karya Unipesoál Lda, José Pires, promete sei servisu ho responsabilidade nune’e bele finaliza tuir kontratu servisu.

“Ami-nia koñesimentu ba suku,!joven sira, komunidade Atudara atu oinsá obra ne’e bele la’o ho di’ak, nune’e labele kria impaktu ba obra ida ita halo ne’e,” nia katak.

Enkuantu obra ne’e implementa ho orsamentu $234,251.08 no sei remata iha fulan setembru 2024.

Notisia relevante: PAM Bobonaro husu joven sira partisipa ativu iha prosesu dezenvolvimentu

Jornalista: Sérgio da Cruz
Editór: Evaristo Soares Martins

iklan
iklan

Leave a Reply

iklan
error: Content is protected !!