DILI, 06 dezembru 2024 (TATOLI)—Prezidente Conselho de Imprensa Timor-Leste, Otelo Ote, sesta ne’e, hala’o enkontru ho Prezidente Parlamentu Nasionál (PPN), Maria Fernanda Lay, hodi atualiza no husu PPN prepara kandidatu hodi reprezenta PN ba iha Conselho de Imprensa (CI).
Notísia Relevante: PPN fó pose ba membru CI Isabel Maria Fernandes de Jesus
Nia dehan, CI daudaun iha hela prosesu atu halo eleisaun ba membru CI foun, tanba CI hetan pose husi Parlamentu Nasionál (PN), entaun iha enkontru ne’e mai iha ne’e atu atualiza informasaun kona-ba asuntu ne’e.
“La’ós Conselho de Imprensa de’it mak sei tau matan ba prosesu iha CI, maibé Parlamentu mós sei envolve. Tanba Parlamentu iha nia reprezentante iha Conselho de Imprensa, entaun ami atualiza ba Prezidente atu hahú ona hanoin kona-ba prosesu hili reprezentante husi Parlamentu Nasionál,” Prezidente CI ne’e hateten hafoin ramata sorumutu iha PN.
Tanba, nia dehan, iha fulan-fevereiru 2025, mandatu Conselho de Imprensa sei ramata, no tenke iha fali membru konsilleiru foun atu hetan fali toma pose ba períodu 2025-2029.
Tuir Lei Komunikasaun Sosiál artigu 45 kona-ba Kompozisaun Konsellu Imprensa alínea c, hateten sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili.
Bazea ba lei Komuniasaun Sosiál nú 5 /2014, 19 novembru, Kapítulu VII estabelse Conselho de Imprensa (CI-sigla portugés), artigu 42 (Natureza no Independénsia), alínea 1 hateten Conselho de Imprensa nu’udar entidade administrativu independente no hala’o ninia atribuisaun nomós kompeténsia la haktuir diretrís ka orientasaun sira podér polítiku nian.
Nune’e mós artigu 45 hosi Lei Komunikasaun kona-ba Kompozisaun Conselho de Imprensa (CI) hamutuk membru na’in-lima, ne’ebé atu hili liuhusi dalan tuir-mai:
a) Reprezentante jornalista na’in-rua ne’ebé sira hili tiha ona liuhosi eleisaun;
b) Reprezentante órgaun komunikasaun sosiál ida, ne’ebé órgaun sira hili tiha ona liuhosi eleisaun;
c) Sidadaun na’in-rua ne’ebé ho kapasidade be ema hotu hatene no iha méritu profisionál ho preferénsia ne’ebé hatutan ba komunikasaun sosiál, hosi sira na’in-rua ida nu’udar jurista, ne’ebé Parlamentu Nasionál hili;
d) Membru sira Conselho de Imprensa hili entre sira ninia Prezidente.
Artigu 47 hosi Lei Komunikasaun Sosiál (Estatutu membru sira-nian) alínea 1 hateten bainhira membru Conselho de Imprensa hala’o knaar sei tau-hamutuk ho ezersísiu atividade profisionál ne’ebé hanesan, sei la selu nein fó subsídiu osan no laiha karáter permanente.
Alínea 2 hosi artigu ne’e fundamenta, membru sira Conselho de Imprensa iha direitu ba seña prezensa tuir termu ne’ebé ninia estatutu sei estabelese karik.
Jornalista : Nelson de Sousa
Editór : Cancio Ximenes
