DILI, 06 dezembru 2024 (TATOLI)–Governu liuhusi Ministériu Juventude Desportu, Arte no Kultura (MJDK) hamutuk ho liña ministeriál, sesta ne’e, konvoka reuniaun dahuluk hodi estabelese Konsellu Nasionál Dezenvolvimentu Juventude.
“Ohin hanesan reuniaun konsultativu tanba tuir dekretu-lei ne’ebé hodi kria Konsellu Nasionál Dezenvolvimentu Juventude, hanesan órgaun ba akonsellamentu ne’ebé liña ministeriál hotu ne’ebé tuteladu iha área juventude atu haree programa ne’ebé estratéjiku ba ita-nia joven sira. Iha ema 18 husi kada ministériu sira, ohin ne’e hanesan reuniaun dahuluk no reuniaun tuir mai membru sira sei simu pose. Konsellu Nasionál Dezenvolvimentu iha diferensa ho Konsellu Juventude,” Ministru Juventude Desportu, Aerte no Kultura, Nelyo Issac Sarmento, informa ba Agência Tatoli, iha resintu MJDK.
Notísia relevante : Planu Asaun Nasionál ba Juventude aprovadu iha Konsellu Ministru
Objetivu establese Konsellu Nasionál Dezenvolvimentu Juventude ne’e atu oinsá bainhira elabora orsamentu no programa sira bele sensível ba joven.
“Ita ko’alia kona-ba joven ne’e la’ós ha’u-nia ministériu mak trata, maibé ministériu ne’e halo polítika ne’ebé estrata polítika Governu nian no halo polítika investimentu ba ita-nia joven. Ha’u fó ezemplu, joven ida hakarak halo vida iha área agrikultura maibé laiha kbiit no kapasidade finanseiru, oinsá atu ba faze produtu nian. Entaun ita espera katak Ministériu Agrikultura bele buka parseiru liu-liu joven sira nune’e iha orsamentu ne’ebé adekuadu hodi apoiu grupu joven sira-ne’e, para sai agrikultór ne’ebé di’ak, sai mós negósiu ne’ebé di’ak iha futuru mai,” Ministru esplika.
Nia dehan, kona-ba agrikultór, bainhira iha negósiu mak presiza halo parseiru ida ho Ministériu Komérsiu Indústria (MKI) atu nune’e bele iha partisipasaun ema ida husi Kámara Komérsiu Indústria (CCI-TL, sigla portugés).
“Tanba ita lakohi joven ida hakarak halo negósiu mak Ministériu Juventude Desportu no Kultura, Ministériu Solidariedade Sosiál no Inkluzaun, no ministériu seluk mós apoiu. Ida-ne’e osan Estadu nian hotu, ita-nia orsamentu la estratéjiku entaun ita define idea hotu no ida-ne’e ita presiza halo agrupamentu husi kada ministériu nune’e bainhira apoiu tenke husi parte ida. Ho ida-ne’e mak tinan tuir mai bele hetan juventude ne’ebé mak iha responsabildade no hatene sira-nia dever, nune’e bele kontribui ba dezenvolvimentu nasaun nian iha futuru,” nia katak.
Jornalista : Osória Marques
Editora : Julia Chatarina
