DILI, 07 dezembru 2024 (TATOLI)–Ministru Transporte no Komunikasaun (MTK), Miguel Marques Manetelu, hateten Governu kontinua esforsu atu kompleta regra no rekezitu Organizasaun Internasionál Aviasaun Sivil (ICAO, sigla inglés) maske iha kondisaun mínimu.
Governante ne’e hato’o asuntu nakait ho loron internasionál aviasaun ne’ebé selebra iha loron 07 dezembru ho tema “Lakehan segur, futuru sustentavel, hamutuk ba tinan 80 mai”. “Céus Seguros. Futuro Sustentável: Juntos pelos próximos 80 anos” ou “Céus Seguros. Um Futuro Sustentável: Juntos pelos próximos 80 anos.”
ICAO hanesan ajensia nasaun unida nian ne’ebé ho objetivu defini paramentu minimu aseitavel ba seguransa aviasaun sivil internasionál.
“Hanesan ita hatene, ita sai ona membru ICAO. Itá koko implementa maske ho kondisaun minimu sira konkorda atu sertifika aeroportu Internasionál Nicolau Lobato nu’udar aeroportu Internasionál,” Ministru Manetelu hato’o hafoin partisipa lansamentu livru ”The Sky is Ours” iha salaun Ministériu Negósiu Estranjeiru no Kooperasaun (MNEK), Avenida de Portugál, Pantai Kelapa, kinta ne’e.
Tuir nia, ICAO rasik haree katak Timor-Leste nasaun ida kiik esforsu atu dezenvolve aan no tuir konvensaun ICAO ne’ebé deklara iha loron 07 dezembru iha Chicago, Estadu Unidu Améika ne’ebé ho objetivu atu kria regara ne’ebé envolve nasaun hotu-hotu iha regulamentu aviasaun sivil.
Objetivu hosi konvensaun ne’e atu salvaguarda aviasaun no fasilita dezenvolvimenti aviasaun sivil no regula espasu aero internasionál no koperasaun entre nasaun no seguransa no asegura aviasaun
“Signifika, ita prienxe hela regra hodi ICAO, maske kondisaun minima no iha tinan oin ICAO sei mai halo audit no ita koko atu hadi’a kondisaun balun atu iha audit. Ita labele hatan valór kiik liuliu seguransa no salvaguarda,” governante ne’e dehan.
Iha sitiu Nasaun unida nian, objetivu loron internasionál ba aviasaun sivil atu ajuda aumenta no fortalese konsiénsia ema hotu iha mundu kona-ba importánsia aviasaun sivil internasionál ba dezenvolvimenti sosiál no ekonomia nasaun hotu nian no papel úniku ICAO mak atu servisu hamutuk nasaun sira atu kria rede globál tranzitu lalais ne’ebé serbí loloos umanidade.
Notísia Relevante: MTK observa aeroportu Oé-Cusse molok atribui sertifikadu hosi ICAO
Jornalista : Jesuína Xavier
Editór : Cancio Ximenes
