OÉ-CUSSE 18 marsu 2024 (TATOLI) – Ministru Transporte no Komunikasaun (MTK), Minguel Marques Gonçalves Manetelu, hamutuk ho ekipa tékniku hosi Aeroportu no Navegasaun Timor-Leste, Empreza Públika (ANATL,E.P) no Autoridade Nasionál Komunikasaun Timor-Leste Institutu Públiku (ANCTL,IP), segunda ne’e, observa funsionamentu aeroportu internasional Rota do Sândalo Oé-Cusse ba futuru bele atribui ona sertifikadu internasionál hosi Organizasaun Internasionál Aviasaun Sivíl (ICAO, sigla inglés) inkluis rejista aviaun ZEESM.
Notísia relevante: João Gonçalves hakarak aeroportu Rota do Sândalo sai padraun internasionál
Ministru Transporte no Komunikasaun, Minguel Marques Gonçalves Manetelu, hateten, pedidu observasaun ne’e mai hosi Prezidente Autoridade RAEOA, Rogério Tiago Lobato, atu haree direita tékniku, fasilidade inklui estrutura sira iha aeroportu Rota do Sândalo.
“Ohin ha’u mai iha ne’e hamutuk ho Prezidente Autoridade, iha hanoin hanesan, katak oinsa maka aeroportu internasionál ne’e bele hetan sertifikasaun atubele hahú nia operasaun, no oinsá maka aviaun ne’ebé iha, ho Orsamentu Jerál Estadu (OJE) hola tiha ona presiza atu rejistu,” Minguel Manetelu, ko’alia iha aeroportu Oé-Cusse.
Nia dehan, iha rekizitu barak, maibé ohin hotu-hotu iha komitmentu ANATL,EP no ANCTL,IP sei haree prosesu sira-ne’e oinsa bele halo ona prosesu ba sertifikasaun no rejistu aviaun nian.
“Ne’ebé ha’u kontente tanba objetivu maka ne’e, aeroportu tenke hetan sertifikasaun, ida-ne’e tuir pedidu hosi Prezidente Autoridade RAEOA, aviaun ne’e tenki rejistu,” nia orgullu.
Notísia relevante:Turizmu no otél sai xave movimentu aéru vizita Oé-Cusse
Prezidente Autoridade RAEOA, Rogério Tiago Lobato, agradese, no presiza forma kooperasaun ho Governu Sentrál nune’e bele hadi’a Oé-Cusse
“Ha’u kontente tanba ministru bele mai Oé-Cusse, hamutuk ho ha’u haree forma kooperasaun atu halo RAEOA ne’e la’o ba oin ho di’ak, iha RAEOA tanba de’it Rejiaun Administrativa espesiál, nia labele rejionaliza buat hotu-hotu, ita tenki rejionaliza tuir ita-nia kapasidade, ne’ebé iha futuru sei iha kooperasaun bo’ot ho ANATL, ho MTK, atu haree oinsá bele hadi’a aeroportu Rota do Sândalo,” nia orgullu.
Eis Ministru Interiór ne’e, espera ho apoia Governu Sentrál liuhosi Ministériu Transporte Komunikasaun sei laiha obstákulu, prosesu sertifikasaun.
“Espera katak sei laiha difikuldade atu hetan sertifikasaun tanba Estadu halo investimentu boot tebes kuaze millaun $170, konta tán ho osan ne’ebé ita halo despeza atu mantein aviaun ZEESM ne’e millaun $26, ne’e katak osan ne’ebé Estadu gasta ona ne’e besik millaun $200, entaun ita tenki poténsializa kapasidade aeroportu nian atu-bele jere reseita hodi taka bele halo retornu ba osan ne’ebé Estadu gasta tiha ona, ne’e bé vizita ohin ne’e atu kria kondisaun barak atu servisu di’ak ho Governu Sentrál,” nia espera.
Notísia relevante: Autoridade RAEOA sei estabelese Autoridade Portuáriu atu jere rasik aeroportu Rota do Sândalo
Entretantu, aeroportu internasionál Rota do Sândalo Oé-Cusse harii iha tinan 2015, hosi empreza estatál Indonézia, PT. Wijaya Karya ho valór kontratu millaun $199,9 no inaugura hosi Prezidente Repúblika Francisco Guteres ‘Lú Olo’ iha loron 18 juñu 2019.
Jornalista: Abílio Elo Nini
Editór: Evaristo Soares Martins
