COVALIMA, 07 Dezembru 2024 (TATOLI) – Prezidente Repúblika, José Ramos Horta, entrega prezente Natál ba prezu sira iha Suai. Atividade ida ne’e inisiativa husi Xefe Estadu nian atu halo asaun karitativa ba povu.
“Atividade entrega prezenta ne’e hanesan programa ida husi Natál ho povo, inisiativa mai husi ita-nia prezidente Repúblika rasik. Atividade Natál ho povu ne’e halo asaun karitativa, halo kompetisaun ba prezépiu no feira”, Asesór ba Asuntu Apoiu Sosiedade Sivíl Sosiál Prezidente Repúblika, Quintiliano Moniz Carvalho, esplikaiha prizaun Suai.
Nia hatutan katak prezente Natál ne’ebé entrega ba dadur sira iha Suai ne’e mós mai Vise-Primeiru-Munistru no Ministru Koordenadór ba Asuntu Ekonómiku no Ministru Turizmu no Ambiente, Francisco Kalbuadi Lay, tuir pedidu ne’ebé simu husi guarda prizionál sira.
Prezente ne’ebé entrega ba prezu sira mak hanesan manta, toalla, sabaun no seluk tan ne’ebé dadus sira presiza iha prizaun laran.
Aleinde entrega prezenta Natál ba dadur sira, parte Prezidénsia Repúblika mós fó apoiu ba labarik sira iha uma mahon Salele no orfanatu iha Tilomar, munisípiu Covalima.
Sekretáriu Munisipál ba Planeamentu no Dezenvolvimentu Integradu, Caetano Ribeiro, dehan ba prezu sira labele haree ba kualidade prezente ne’e, maibé haree ba símbolu domin husi Xefe Estadu.
“Ida-ne’e domin husi Prezidente Repúblika, tanba moris iha mundu la sees husi sala. Ha’u husu nafatin atu hasa’e orasaun no presiza atu halo reflesaun”, nia fó hanoin.
Total prezu iha Suai hamutuk 121, ne’ebé kumpre prizaun preventiva hamutuk 23 no sentensa 98.
Jornalista: Celestina Teles
Editora: Maria Auxiliadora
