COVALIMA, 09 Dezembru 2024 (TATOLI) – Atividade korrida bisikleta ne’ebé etapa dahuluk hahú iha Fulan Fehan-Belu bá Betun, Pantai Loodik-Malaka ho distánsia 83.6 km no iha etapa daruak husi Betun bá Suai Loro-Covalima ho distánsia 109 km ne’e, siklista husi Austrália ho naran Gina Ricardo ho númeru 030 mak to’o dahuluk no tuirmai mak timoroan João Bosco Ximenes ho númeru 024.
Iha terseiru mak siklista husi Indonézia ho naran Riskiaji Primastono ho númeru 008, ne’ebé sira-nia start ne’e iha tuku 07:00 oras Malaka-Indonézia.
Koordenadór Eventu Timor Island Adventure, Joel Maria Perreira, informa katak daudaun ne’e júri husi eventu seidauk bele fó sai rezultadu tanba sei hein iha faze finál nian.
“Atu determina manán-na’in iha kompetisaun ne’e, júri na’in-tolu serbisu hamutuk, timoroan nain-rua no ida husi Indonézia mak halo selesaun ho nia kritériu atu sai manan-na’in iha eventu ne’e ho uza mídia sosiál no partisipante foti vídeo ho durasaun minutu 3 no fotografia tolu no upload iha mídia sosiál hodi haree viewers barak nia mak posibilidade atu manán”, Joel Perreira esplika iha Suai Loro, ohin.
Atividade korrida bisikleta Timor Islanda Adventure ne’e nia orsamentu mai husi Prezidénsia Repúblika hamutuk rihun $260. Aleinde ne’e, hetan kontribuisaun husi empreza Telemor $11.800, ne’ebé kompostu husi osan cash $9.800 no ekipamentu komunikasaun rihun $2 no empreza Timor Telecom apoia rihun $4.
Iha eventu ne’e, komisaun sei fó prémiu monetáriu ba vensedór dahuluk $5.000, daruak $4.000 no datoluk $3.000. Aleinde ne’e, sei iha mós prémiu ba kategoria nasionál.
Eventu ne’e halo abertura iha Fulan Fehan-Indonezia ne’ebé siklista rejistadu hamutuk 49, ida husi nasaun Indonézia, Austrália tolu no Timor-Leste 45 mak partisipa iha korrida bisikleta ne’e.
Objetivu husi organiza eventu Timor Island Adventure mak atu hametin relasaun entre sidadaun Timor-Leste no nasaun viziña Indonézia, liuliu komunidade ne’ebé hela iha fronteira no oinsá atu promove sítiu turístiku husi país rua, espesialmente iha illa Timór.
Atividade ne’e tama ona etapa daruak husi Malaka-Indonezia mai iha Covalima ho distánsia 109 km, etapa datoluk ho distánsia hahú husi Suai Loro bá Same-Ruak (Manufahi) ho 72.67 km, dahaat husi Manufahi bá Aubeon-Natarbora (Manatuto) ho distánsia 67.2 km.
Etapa dalimak hahú husi Natarbora bá Loihunu-Ossú (Viqueqeu) ho distánsia 67.6 km no etapa finál husi Viqueque bá Baucau ho distánsia 61.3 km.
Sikilista Carolina da Costa ho númeru 023 agradese ba komisaun organizadora, tanba bele organiza eventu ne’e hodi kria amizade entre Timor-Leste no Indonézia. “Ha’u rekomenda atu aumenta númeru seguransa iha fatin fuik sira nomós lori alimentasaun labele dook husi distánsia ne’ebé ami halai ho bisikleta”, nia sujere.
Notísia relevante: Assanami halo abertura ba eventu Timor Island adventure iha Atambua
Jornalista: Celestina Teles
Editora: Maria Auxiliadora
