VIQUEQUE, 09 dezembru 2024 (TATOLI)- Diretór Servisu Agrikultura Munisípiu Viqueque, Olivio Soares Freitas, informa, Ministériu Agrikultura, Peskas, Pekuaria no Floresta (MAPPF) distriu ai komersiál hanesan sabraka hamutuk 1.200 hodi kuda iha postu Viqueque Vila no postu Ossú, munisípiu Viqueque.
“Iha fulan kotuk (novembru) ekipa MAPPF distribui ona ai-sabraka hamutuk 1.200 mai munisípiu Viqueque, maibé ida-ne’e sai hanesan programa pilotu ida ne’ebé ita implementa uluk iha postu rua atu kuda uluk ai-oan sabraka”, Olivio Soares Freitas, hateten ba Tatoli, iha ninia knaar fatin, Beloi, ohin.
Olivio profuda, programa kuda ai-komersiál ka sabraka ba postu rua bainhira progresu di’ak mak tinan oin sei kontinua halo espansaun iha postu tolu ne’ebé seidauk hetan ai-komersiál.
“Ita distribui ai-sabraka ba grupu rua hanesan grupu Mane Mesak, husi Klalerek Mutin postu Viqueque Vila no Sentru Extensaun Agrikultura Larigutu Oan, postu Ossú. Ba programa kuda Sabraka oan ne’e, ami sei halo kontrolu másimu hahú husi kuda to’o kolleta”, nia promete.
Ho programa kuda sabraka ne’e, nia dehan programa ida-ne’e maka la’o susesu, ba oin sei la depende ai-fuan sabraka mai husi rai li’ur.
Tuir dadús distribuisaun ai-komérsiál ba grupu Klalerek Muntin hamutuk ai-oan 400 ne’ebé okupa rai besik ektare ida no ba Sentru Larigutu, postu Ossú hamutuk 800 okupa rai ektare ida.
Notisia relevante: Florestál Baucau distribui ai-oan kuda iha suku 59
Jornalista : Vitorino Lopes da Costa
Editór : Florencio Miranda Ximenes
