(Pe. Domingos G. de Araújo, misionáriu SVD iha Portugal)
Komunidade Maucola iha Suai, Timor-Leste, dezde dia 8 dezembru 2024, marka momentu istóriku ne’ebé bele realiza sira hotu nia mehi atu harii Kapela foun ida. Planu ba obras kapela ne’e, komesa iha fulan-fevereiru 2021, ho situasaun krizi Pandemia, maibé grasa Maromak nian, tempu ohin bele iha realizasaun ba mehi ida-ne’ebé povu Maucola hein durante tempu-naruk.
Dezde tinan-1984, Kapela Antiga harii, iha tempu transmigasaun. No hahú husi tempu ne’ebé Kapela nu’udar fatin ba ema hotu atu halo orasaun, aprende dutrina fé nian, sa tan ho situasaun no dezafiu ne’ebé ita enfrenta durante funu ne’ebé naruk to’o iha tinan-1999.
Hanesan Maucola-oan, ne’ebé halo misaun iha portugal no nu’udar misionáriu SVD, ha’u sente iha obrigasaun atu bele buka dalan karik hetan ajuda ruma ba renovasaun fatin sagradu ida-ne’e. Hahú halo komunikasaun ho pároku iha Suai, hodi envolve mós komunidade Maucola, inklui joven sira ne’ebé emigrante iha Korea, Austrália, Inglaterra no Indonézia, ami hahú halo planu ida atu mobiliza rekursu sira ne’ebé nesesáriu ba kontrusaun Kapela foun ne’e. Ho fiar no determinasaun, ha’u buka apoiu husi Sekretariadu Misaun Misionárius Verbu Divinu (SVD) iha Portugal no ideia ne’e hetan apoiu di’ak.
Grasas ba projetu “Mãos Missionárias” husi Missionários do Verbo Divino (SVD) iha Portugal, no generozidade hosi leigu sira, kapela foun ne’e komesa. Maski nune’e, momentu ne’ebá sei presija ajuda barak tanba kondisaun komunidade Maucola rasik la to’o. Ho bensaun husi Maromak, ami hetan apoiu di’ak mós husi doadór sira husi Portugal, Indonézia no joven emigrante sira husi Maucola ne’ebé serbisu iha rai-li’ur hanesan Korreia, Austrália i Inglatera. Sira hotu nia ajuda, esforsu, no lian ida, maka buat hotu la’o ho di’ak, hamutuk mós ho komisaun lokál ne’ebé lidera hosi Sr. Domingos Barreto, Sr. José Barros, Shra. Maria Toro, Caetano, Katekista Sr. Adelino Guterres no joven intelektuál sira (ou profesór balun iha Maucola).
Joven emigrante sira ne’ebé lidera husi Joaquim-Akin no Stanislaus (iha Korea), hamutuk ho Abeto (iha Austrália), maka hanesan porta-voz sira ba komunikasaun ba maun-alin Maucola oan sira ne’ebé serbisu iha li’ur. Sira hotu ho ulun malirin fó sira-nia kontribuisaun signifikadu. Dezeñu kapela ne’e rasik hetan apoiu, ou oferese husi arkitéktu Sr. Januário Maia Guterres.
Iha loron 8 dezembru 2024, kapela foun ne’e inauguradu ona ne’ebé Misa prezida ho solenidade husi Amo pároku Padre Sebastião, iha ambiente ne’ebé nakonu ho haksolok no gratidaun. Grasa Maromak nian, buat hotu la’o di’ak.
Hetan mós ajuda imajen padoreira Nossa Senhora Imaculada Conceição no Kristu Kruxifikadu ne’ebé valiozo diretamente husi SVD Portugal, no iha mós imajen ou estatua Sagrado Coração Jesus (husi Atambua, Indonézia).
Inaugurasaun ne’e hanesan momentu úniku no istóriku
Ramata tiha misa inagurasaun, komunidade sira haksolok hamutuk hodi hatudu mós bidu ou dansa tradisionál kultura nian hanesan Tebe-Tebe.
Ita hotu kontente no haksolok, tanba liuhusi dedikasaun no esforsu boot, ita hotu bele halo mehi bo0t ida-ne’e sai realidade.
Hanesan Maucola-oan, ha’u fó gratidaun profundu ba doadór no maluk sira hotu ne’ebé kontribui ba misaun ida-ne’e.
Fiar katak, imi hotu nia jenerozidade, la’ós de’it atu harii edifísiu Kapela ida-ne’e, maibé hatudu sinál esperansa no fiar ba komunidade ou sarani Maucola tomak, katak hamutuk ho Maromak ita bele.
Kapela foun ne’e sei sai hanesan fatin-lulik ba jerasaun tuirmai, no sai fatin di’ak, ba ema hotu hasa’e nia orasaun, fatin ba hala’o dutrina ba jerasaun foun sira no fatin ba sarani sira hotu. Ne’eduni presiza ita hotu nia kuidadu no atensaun, atu fatin ne’e sai fatin-lulik no uma fukun fiar nian, ba sarani tomak ne’ebé presiza.
Parabéns ba maun-alin, no doadór sira husi fatin hotu-hotu.
Kapela hamriik ona ho di’ak. Sinál katak ita hotu nia esforsu iha rezultadu. Maromak sei fó-bensa ba imi hotu ne’ebé fó ona imi-nia kontribuisaun, dezde hahú obra kapela ne’e to’o ramata ho inagurasaun.
Hamutuk iha fiar ba Maromak no domin atu hadomi malu hodi hala’o serbisu hamutuk, mehi maski boot, sei sai realidade.
