DILI, 09 dezembru 2024 (TATOLI)—Meza Parlamentu Nasionál (PN) liuhusi reuniaun plenária, segunda ne’e, halo anúnsiu admisaun no baixa ba Komisaun C trata asuntu Finansa Públika ba proposta-lei númeru 14/VI (2a)-Enkuadramentu Orsamentu Jerál Estadu no Jestaun Finanseira Públika hodi bele halo apresiasaun inisiál.
“Iha ajenda períodu ordem do dia, iha anúnsiu admisaun no baixa ba Komisaun C trata asuntu Finansa Públika ba proposta-lei númeru 14/VI (2a)-Enkuadramentu Orsamentu Jerál Estadu no Jestaun Finanseira Públika, ami konvida Prezidente Komisaun C,” Prezidente Parlamentu Nasionál ein Ezersísiu no Atual Segundu Vise Prezidente PN, Alexandrino Afonso Nunes, fó sai iha sala plenária PN, segunda ne’e.
Kona-ba konteúdu detallu ba proposta-lei, nia dehan, meza seidauk ko’alia detallu tanba komisaun sei halo uluk apresiasaun inisiál.
Antes ne’e, Governu liuhusi reuniaun ordinária Konsellu Ministru (KM), kuarta ne’e, aprova ona projetu proposta lei, ne’ebé aprezenta husi Ministra Finansa, Santina José Rodrigues F. Viegas Cardoso, kona-ba Lei Jestaun Finanseira Públika, ne’ebé substitui lei nú. 2/2022, loron 10 fevereiru.
Notísia Relevante: Governu hametin jestaun finanseira públika hodi hadi’a prosesu orsamentál
Jornalista : Nelson de Sousa
Editór : Cancio Ximenes
