Espesialista ortopédiku HNGV lamenta ho ekipamentu implante

DILI, 10 dezembru 2024 (TATOLI)—Espesialista Ortopédia iha Ospitál Nasionál Guido Valadares (HNGV), Nilton do Carmo da Silva, hateten katak daudaun ne’e ekipamentu implantável ba tratamentu pasiente fratura iha HNGV la adekuadu.

“Instrumentu implante sira maka ferramenta sira ne’ebé uza hodi trata fratura ruin nian,” Nilton do Carmo da Silva, informa iha HNGV ohin.

Nia dehan, ko’alia kona-ba númeru asidente sira, aumenta maibé ferramenta sira ne’ebé hodi trata pasiente fratura sira la adekuadu.

Tuir espesialista ortopedia ne’e, husi janeiru to’o inísiu dezembru 2024, pasiente fratura ne’ebé halo hela tratamentu iha HNGV hamutuk 500, entaun ida-ne’e sai problema iha HNGV tanba fasilidade hanesan instrumentu implante la adekuadu.

“Ami, nu’udar médiku espesialista, hala’o nafatin ami-nia kna’ar nu’udar médiku, hodi fó tratamentu ba pasiente sira ne’ebé ruin tohar, to’o sira rekupera maibé tuir situasaun ne’ebé iha. Ami labele halo promesa ruma tanba ne’e la’o tuir ho fasilidade ne’ebé iha,” nia dehan.

Lisensa sein saláriu

Tuir médiku ne’e, daudaun ne’e ekipamentu ospitalár iha HNGV la adekuadu impede médiku sira hala’o sira-nia kna’ar nu’udar médiku espesialista, mak rezulta médiku espesialista na’in neen husu lisensa sein saláriu, ida mak médiku espesialista ortopédiku, Nilton do Carmo, no sira seluk lakohi fó sai sira-nia naran.

“Iha médiku balun ne’ebé foti desizaun ne’e, inklui ha’u, tanba ema hateten ba sira katak sira fó de’it atendimentu ba pasiente sira semana ida dala ida de’it, no simu saláriu matak, entaun ami deside atu foti lisensa temporáriu la ho saláriu, hafoin fasilidade sira adekuadu, ami sei mai fali,” nia esplika.

Bazeia ba asuntu ne’e, TATOLI konfirma Diretora HNGV no hatan katak iha tinan-2025, HNGV sei halo akizisaun ba ekipamentu ospitalár sira.

Notísia relevante:HNGV sei sosa ekipamentu, objetivu hamenus transferénsia pasiente ba estranjeiru

Jornalista : Felicidade Ximenes

Editór: Rafael Ximenes de A. Belo