OÉ-CUSSE, 10 Dezembru 2024 (TATOLI) – Kuda aman ho naran estimadu Boen Ana Binino mate depoizde treinu iha pista kompetisaun korrida cavalo iha aldeia Noeninen, suku Cunha. Kuda ne’e tuir planu atu kompete ho kuda neen seluk iha loron 09 Dezembru.
Prezidente Asosiasaun Corrida Cavalo Oé-Cusse Ambeno (ACCOA), Mário Muni Salu, dehan kuda ne’e tama iha klase lokál grupu A nian, tanba kompetisaun antes iha 20 Maiu, ne’ebé realiza iha suku Lifau ne’e nia sai vensedór dahuluk.
Nia dehan kuda na’in, Nicodemus Elu dada ona rifa atu kompete ba klase lokál iha grupu A no halo preparasaun másima, maibé la konsege tanba kuda mate tiha iha domigu loraik.
“Nia na’in kala triste demais, soe de’it kuda iha ne’e depois komunidade sira mak hakoi no iha loron ne’e kedas nia na’in fila ona bá moris fatin iha suku Abani iha Pássabe”, nia hateten.
Iha sorin seluk, Aleixo Elu konta katak, iha domingu loraik, sira tama treinu hela iha pista halai kuda nian no bainhira treinu hotu sira fila bá fatin deskansa nian.
“Ami deskansa hotu tiha lori kuda sira bá hariis iha mota. Ami mai fali no to’o iha ne’e kuda la hamriik ona, nia toba de’it. Ami koko halo nia hamriik maibé hamriik tiha toba fali no hamriik mós susar loos”, nia konta.
Tanba kuda moras ona, nune’e sira deside buka ai-moruk tradisionál no sira konvida katuas ida mak rega ho bee no ai-moruk tradisionál, maibé laiha mudansa. “Ami muda bá fatin seluk, maibé seidauk to’o fatin ne’e, kuda monu de’it ona iha dalan no mate liu, nune’e ha’u-nia alin ne’e [Nicodemus Elu, kuda na’in] tanis no soe de’it kuda iha ne’e, nia foti de’it tali no la’o ain de’it bá to’o Pássabe”, nia dehan.
Aleixo Elu lembra katak sira husi Pássabe bá aldeia Noeninen iha loron 22 Novembru antes Loron Proklamasaun Indpendénsia 28 Novembru no sira lori kuda lima. “Ha’u mai ho alin na’in-rua lori kuda lima, ha’u lori rua, alin ida lori rua no Nicodemus Elu ne’e nia lori ida de’it, maibé mate tiha, entaun nia agora fila ona”, nia salienta.
Kompetisaun korrida cavalo ne’e hala’o durante loron lima, husi 09 to’o 13 Dezembru, ne’ebé partisipa husi nasaun viziña Indonézia, liuliu husi provínsia Nusa Tenggara Timur.
Notísia relevante: Kuda 92 husi NTT no Timor-Leste kompete malu iha Oé-Cusse
Jornalista: Abílio Elo Nini
Editora: Maria Auxiliadora
