OÉ-CUSSE, 09 Dezembru 2024 (TATOLI) – Prezidente Repúblika, José Ramos Horta, halo abertura, ohin, ba kompetisaun kuda halai taru iha suku Cunha, sub-rejiaun Pante Makasar, Rejiaun Administrativa Espesiál Oé-Cusse Ambeno (RAEOA), ne’ebé envolve kuda 92 husi Timor-Leste no Nusa Tenggara Timur (NTT)-Indonézia.
Kompetisaun corrida cavalo ne’e nu’udar eventu rejionál, tanba envolve mós kuda husi provínsia NTT hodi komemora Loron Proklamasaun Independénsia 28 Novembru ho tema “Hamutuk promove povu no rai Enklave Oé-Cusse Ambeno nu’udar belun no fatin ba ema hotu”.

“Ohin, ha’u mai iha Oé-Cusse dezde ha’u-nia mandatu. Dala barak ona hetan oportunidade mai, la falta. Mak ne’e, obrigadu, boa sorte ba kuda na’in-sira, sei kuda halai mak ita taru, kompetisaun sei rame liután iha Oé-Cusse”, Prezidente Horta ko’alia iha abertura eventu ne’e iha suku Cunha, ohin.
FOTO ATUÁL: Abertura kompetisaun kuda halai taru iha Oé-Cusse
Iha fatin hanesan, Prezidente Autoridade RAEOA, Rogério Tiago Lobato, agradese ba prezensa Xefe Estadu nian iha atividade ne’e, tanba eventu ne’e nu’udar kontinuasaun husi Loron Proklamasaun 28 Novmebru ne’ebé tinan ne’e selebra iha Oé-Cusse.
“Tradisaun halai kuda ne’e atividade kle’ur ona. Ne’e iha raan ema Oé-Cusse nian, mezmu iha tinan 40 ba kotuk kuda nunka halai iha ne’e, maibé sira [komunidade] haki’ak nafatin kuda, hein katak iha loron ida sira-nia mehi ne’e bele sai duni realidade”, nia hateten.
Notísia relevante: Kompetisaun kuda halai taru iha Oé-Cusse adia ba Dezembru
Prezidente Assosiasaun Corrida Cavalo Oé-Cusse Ambeno (ACCOA), Mário Muni Salu, hateten objetivu husi kompetisaun kuda halai taru mak atu festeza komemorasaun Loron Proklamasuan Independénsia ba da-49, hakarak hamoris kultura kompetisaun kuda halai taru ho lian baikenu ‘Hopu-Bikase ka Bikase-Hopu’, tanba Hopu-Bikase sai hanesan kultura jogu tradisionál iha Oé-Cusse ba ema agrikultór sira.

Aleinde ne’e, atu promove kultura kompetisaun sai hanesan indústria ida, tanba ohin loron iha mundu tomak kuda nu’udar animál estimadu ba ema. “Tan ne’e ami foti nia direitu atu bele moris hamutuk ho ema, bele anima ema, atu haree nia halai ho jeitu, oinsá bele halai ho loloos, nune’e bele hetan finalidade iha fatin kompetisaun hanesan ita ema”, dehan.
Nia salienta katak kuda sira-ne’ebé atu halai iha eventu ida-ne’e, totál kuda lokál 63, kompostu husi kuda inan haat no aman 59, ne’ebé mai husi sub-rejiaun Pante Makasar iha kuda 21, Pássabe 29, Oésilo 10 no sub-rejiaun Nítibe tolu.
Kuda husi provínsia NTT iha provizoriamente 27, tanba balun sei kontinua mai, ne’ebé kompostu husi Rote haat, Kupang haat no husi Timor Tengah Utara (TTU) 19.
“Totál kuda atu halai iha kompetisaun ne’e hamutuk 92, komposta husi klase lokál 63 no klase rejionál 27, no husi munisipíu Covalima sei komunika hela. Balun aban sei mai to’o Oé-Cusse”, afirma.
Notísia relevante: Kuda 24 konsege tama finál kompetisaun Corrida Cavalo iha Oé-Cusse
Kompetisaun ne’e hala’o durante loron lima, hahú iha loron 09 to’o 13 Dezembru 2024. Kona-ba prémiu Komisaun Organizadora sei fó sai iha ámbitu atribuisaun prémiu ba kuda manán na’in-sira.
Jornalista: Abílio Elo Nini
Editora: Maria Auxiliadora