OÉ-CUSSE, 25 Novembru 2024 (TATOLI) – Desportu tradisionál corrida cavalo, hodi komemora Loron Proklamasaun Independénsia, iha Rejiaun Administrativa Espesiál Oé-Cusse Ambeno (RAEOA, adia ba Dezembru tanba empreza sei halo hela konstrusaun ba kampu.
Prezidente Asosiasaun Corrida Cavalo Oé-Cusse Ambeno (ACCOA) Mário Muni Salu, informa katak, antes ne’e, autoridade RAEOA ajenda ona kompetisaun kuda halai taru ne’e iha ámbitu Loron Proklamasaun Independénsia 28 Novembru, maibé kampu mak sei iha faze konstrusaun.
“Tuir planu, loloos ita realiza iha loron 16 Novembru atu tama finál iha 28 Novembru. Ita adianta tanba kampu corrida nian kompañia halo hela konstrusaun, maibé ita iha serteza atu implementa iha tempu badak kuandu konklui”, Mario Muni Salu dehan ba jornalista sira iha Otel Ambeno, ohin.
Nia dehan kompetisaun corrida cavalo nu’udar desportu tradisionál, nune’e presiza kria fatin iha di’ak ba kuda sira atu kompete ho seguru.
“Progresu konstrusaun kampu corrida fizikamente nia lutu halo iha laran hotu ona, hela li’ur. Ita ko’alia kona-ba kompetisaun corrida cavalo, ita ko’alia mós kondisaun kampu, tanba kuda ne’e sensivel, nia tenke halai iha fatin dignu, tan ne’e ita pasiénsia hodi hein”, nia dehan.
Tanba ne’e, bainhira konstrusaun kampu atinje ona 100%, parte Asosiasaun Corrida sei fó sai informasaun ofisiál ba kada suku ho kedas kalendáriu rejistrasaun ba kuda sira.
“Agora ami seidauk fó sai konvite ka informasaun ofisiál ba maluk sira kuda na’in, tanba kontrusaun sei la’o hela, ita hein tan semana rua hanesan ne’e, kuandu remata ona mak ami foin taka avizu iha suku idaidak atu sira bele hatene kritériu mai rejistu kuda ne’e oinsá”, nia dehan.
Konstrusaun kampu ne’e husi empreza Timor-Lorosa’e ho nia medida tuir padraun internasionál mak metru 1.200.
Xefe suku Cunha, Domingos Seco Caunan, dehan, iha inisíu konstrusaun, mosu disputa entrea autoridade RAEOA no komunidade, maibé daudaun ne’e rezolvidu hodi entrega ona ba Governu
“Komunidade sira maioria deklara atu entrega ba Governu, tanba sé ema ida ka rua mak uza, rai ne’e mós la’ós privadu, ne’ebé iha fatin balun sei entrega ba Edukasaun atu halo eskola, tanba fatin ne’e komunidade balun rejeita maibé maioria mak konkorda atu entrega ba Governu hodi halo dezenvolvimentu, ne’ebé laiha problema”, nia dehan.
Kampu ba kompetisaun corrida cavalo ne’e konstrui iha aldeia Noeninen, suku Cunha, sub-rejiaun Pante Makasar.
Notísia relevante: Kompetisaun korrida cavalo iha Oé-Cusse sei akontese iha Outubru
Jornalista: Abílio Elo Nini
Editora: Maria Auxiliadora
