OÉ-CUSSE, 12 Agostu 2024 (TATOLI) – Prezidente Asosiasaun Korrida Cavalo Oé-Cusse Ambeno (AKKOA), Mario Muni Salu, informa Autoridade Rejiaun Administrativa Espesiál Oé-Cusse Ambeno (RAEOA) no Sekretaria Estadu Arte no Kultura (SEAK) sei organiza, iha Outubru, kompetisaun korrida cavalo liuhusi festivál fronteira iha Oé-Cusse.
“To’o agora ami seidauk simu konvite, maibé informasaun ofisiál husi autoridade RAEOA hato’o ona mai asosiasaun atu prepara hodi organiza kompetisaun korrida iha ámbitu festivál fronteira ne’ebé sei akontese iha Outubru”, Mário Salu dehan ba Tatoli, ohin.
Prezidente asosiasaun ne’e esplika katak eventu ne’e realiza ho objetivu mak atu harame festivál fronteira entre Indonésia no Timor-Leste iha Oé-Cusse no atu hamoris filafali kultura korrida kuda, hanesan desportu komunitáriu no persiza promove ba jerasaun foun sira.
Notísia relevante: Ohin, Kuda neen hosi Oé-Cusse dezloka ba TTU
Nia relembra, antes ne’e mós, autoridade RAEOA realiza enkontru preparativu ba kriasaun komisaun organizadora ba realizasaun atividade boot rua mak realiza festivál fronteira iha fulan outubru no komemorasaun 28 Novembru, Loron Proklamasaun Independénsia.
“Atividade kompetisaun kuda mós prevista iha laran. Eventu boot rua ne’e, sei realiza iha Oé-Cusse, maibé asosiasaun nia prokupasaun mak kampu de’it, tanba to’o agora seidauk iha kampu atu uza, nune’e nia husu ba Governu atu kria fatin ida di’ak ne’ebé priénxe kritériu”, dehan.
Notísia relevante: Kuda 39 iha Oé-Cusse kompete iha Corrida Cavalo hodi komemora loron Restaurasaun Independénsia
Nia salienta katak daudaun iha kampu ida ne’ebé lokaliza iha suku Lifau, maibé ida ne’e ki’ikliu tanba nia medida metru-650 de’it, tanba tuir padraun tenke metru-1200. Ida-ne’e mak ami espera Governu bele deside hodi indika fatin ruma bele sai fatin permanente hanesan mós direitu atu halo kompetisaun hodi anima komunidade ne’ebé haki’ak kuda”, nia afirma.
Festivál fronteira ne’e sei envolve nasaun viziña Indonézia, liuliu sira husi NTT, inklui munisipíu sira ne’ebé besik fronteira hanesan Bobonaro no Covalima.
Notísia relevante: Abitante Umenoah rejeita autoridade RAEOA harii kampu korrida cavalo
Jornalista: Abílio Elo Nini
Editora: Maria Auxiliadora
