OÉ-CUSSE, 21 novembru 2023 (TATOLI) – Kuda neen (6) hosi Rejiaun Administrativa Espesiál Oé-Cusse Ambeno (RAEOA), tersa ne’e, dezloka ba distritu Timur Tengah Utara (TTU), hodi partisipa iha eventu piala Bupati TTU ba dala-19, no kuda lejendáriu Letebitimo hosi sub-rejiaun Pássabe kansela.
Notisi relevante: Kuda hitu hosi Oé-Cusse sei kompete iha eventu piala Bupati TTU dala-19
Iha serimónia despedida ne’e, Vise-Prezidente CDTL Oé-Cusse, Raimundo Elo, apela, reprezenta RAEOA no Timor-Leste, presiza hatudu disiplina no kumpri regulamentu sira tuir nasaun Repúblika Indonézia nian.
“Ita ba ne’e, la’ós ita mesak, ita ba nu’udar reprezenta Timor-Leste, tanba eventu ne’e iha ema nia nasaun, entaun ita presiza kumpre sira-nia regulamentu, ida-ne’e maka parte ida hamorin Timor-Leste nia naran, katak ita mós iha kuda poténsia hodi hola parte iha eventu ne’e,” Raimundo Elo, hato’o iha ámbitu serimónia despedida hala’o iha Oébau, Oé-Cusse.
Prezidente Prezidente Assosiasaun Kurrida Cavalo Oé-Cusse Ambeno (AKKOA, sigla portugés), Mario Muni Salu, klarifika, kuda Letebitimu kansela, tanba la prienxe kritéira sira iha fronteira.
“Ita hatene kuda Letebitimo, nia mak naran viral iha Oé-Cusse to’o eventu sira uluk iha Kupang no TTU tanba sempre hetan vensedór kada tinan, maibé ohin ita kansela tanba pasaporte mate no laiha preparasaun di’ak, entaun ita kansela,” nia katak.
Notísia relevante:Aniversáriu sidade Kefamenanu, nu’udar opurtunidade hametin kooperasaun entre RAEOA-TTU
Entretantu, kuda neen ohin dezkloka ne’e maka hanesan, iha sub-rejiaun Pante Makasar kuda inan ho naran Leosa’e Feotmese Lifau hosi suku Costa, kuda Anin Salu Mata hosi suku Naimeko, no kuda Sky Meo-Ana Padimau hosi suku Costa.
Nune’e mós hosi suku Abani sub-rejiaun Pássabe hanesan, kuda aman Tonyo Falo, kuda inan ho naran Gadis Lifau hosi suku Abani, no kuda Naobtuan.
Purtantu, kompetisaun desportu tradisionál ne’e sei realiza iha kampaun kuda halai taru iha Tanjung-Bastiang Wini sub-rejiaun Insana Súl distritu TTU, ne’ebé tuir planu sei abertura iha loron kuarta (22/11/2023).
Jornalista: Abílio Elo Nini
Editór: Evaristo Soares Martins
