OÉ-CUSSE, 09 Agostu 2024 (TATOLI) – Uma-kain 20 iha aldeia Umenoah, suku Cunha, sub-rejiaun Pante Makasar, rejeita Autoridade Rejiaun Administrativa Espesiál Oé-Cusse Ambeno (RAEOA) atu harii kampu korrida cavalo, tanba fatin konstrusaun ba kampu ne’e nu’udar rai eransa nian.
Rosa Corbafo, abitante afetada iha aldeia Umenoah, la kontente tanba autoridade RAEOA la halo koordenasaun ho sira atu konstrui kampu ne’e iha sira-nia aldeia.
“Ami lakohi, rai ne’e ami-nian. Uluk ami moris iha fatin ne’e, maibé tanba uma besik mota mak ami muda mai. Agora, Governu atu halo fatin ne’e ba kampu korrida. Ami sei la aseita, tanba lori eskavadór mai ke’e bebeik mota-ninin ne’e, entaun fó ameasa ba ami no rai ne’e eransa, la’ós Estadu nian”, Rosa Corbafo lamenta liuhusi konferénsia imprensa ne’ebé realiza iha suku Cunha, ohin.
Notísia relevante: Kuda 39 iha Oé-Cusse kompete iha Corrida Cavalo hodi komemora loron Restaurasaun Independénsia
Nia lembra katak, iha inisíu, lahalo konsulta ho komunidade atu husu ideia kona-ba fatin ne’e. “Sira la husu ami atu enkontru iha sede suku iha Tono. Laiha koordenasaun husi autoridade lokál sira, agora, mai sobu ona, ami tenke hamriik”, nia afirma.
Iha fatin hanesan, Gonzalo Fraz, lembra katak, antes ne’e, autoridade RAEOA liuhusi Sekretaria Rejionál ba Asuntu Terra no Propriedade realiza ona enkontru ho komunidade iha suku Cunha molok utiliza fatin ne’e sai kampu korrida Oé-Cusse nian.
“Momentu ne’ebá ha’u laiha fatin. Xefe aldeia sira mós la informa ami. Ha’u rona dehan iha enkontru dalarua, maibé ami lahatene katak rai ne’e atu uza ba kampu korrida nian. Tanba ne’e mak agora mai suru ona, entaun ami tenke hatene, tanba rai ami-nian”, nia salienta.
Prezidente Asosiasaun Korrida Cavalo Oé-Cusse, Mário Muni Salu, hateten asosiasaun laiha kompeténsia atu deside fatin ne’e, maibé autoridade RAEOA liuhusi Servisu Terra no Propriedade mak indika fatin ne’e.
“Asosiasaun hanesan reprezenta kuda-na’in sira iha Oé-Cusse ejize nia direitu ba Governu atu tau-matan hodi prepara kampu atu promove desportu tradisionál halai kuda, tanba fatin antes uza iha Lifau ki’ik liu no la prienxe padraun. Agora, autoridade indika ona fatin ba ami atu uza ne’e mak eskavadór tama hodi suru rai, maibé komunidade sei kestiaona, entaun kompeténsia iha autoridade atu rezolve no haree estatutu rai ne’e”, nia dehan.
Notísia relevante: https://tatoli.tl/2024/05/21/kuda-24-konsege-tama-final-kompetisaun-corrida-cavalo-iha-oe-cusse/
Iha sorin seluk, Sekretáriu Rejionál ba Asuntu Terra no Propriedade, Marcelino Marques Coro, konfirma katak fatin atu harii kampu korrida cavalo ne’e nia estatutu rai abandonadu, ne’ebé administra husi Governu liuhusi Servisu Terra no Propriedade RAEOA.
“Antes halo kampu ne’e, ami konsulta dala-tolu ho komunidade no autoridade lokál sira iha suku Cunha. Nia rezultadu, maioria aseita no husu autoridade bele uza fatin ne’e atu halo kampu”, hateten.
Nia lembra katak, hafoin halo konsulta, bazeia ba pedidu ne’ebé hato’o husi Asosiasaun Korrida Cavalo Oé-Cusse Ambeno katak sira observa ona fatin ne’e hamutuk ho Prezidente Autoridade no Koordenadór ZEEDOA no akompaña mós husi komunidade no lidér lokál sira.
“Komunidade rasik mak deklara katak atu utiliza fatin ne’e, tanba ne’e rai abandonadu públiku, entaun rai ne’e pertense ba Governu, liuliu Servisu Terra no Propriedade mak administra”, nia esplika.
Responsavel ne’e salienta katak eskavadór dudu rai durante loron lima ona no laiha kontestasaun husi komunidade, maibé agora mak balun hato’o sira-nia protestu. “Ha’u rasik hasoru ona sira atu husu sira-nia hakarak ne’e oinsá. Kuandu ekipa to’o iha fatin komunidade sira-ne’ebé reklama kona-ba estatutu rai ne’e sira preokupa tanba besik mota, maibé iha momentu halo konsulta ne’e ami hateten katak fatin ne’e ita sei hadi’a no sei proteje, tanba fatin ne’e sai permanente ba kampu korrida ida iha Oé-Cusse”, nia esplika.
Tanba ne’e, nia dehan, obra ne’e tenke kontinua no sei laiha impedimentu ba programa Estadu nian no karik iha lamentasaun bele aprezenta direta ba autoridade RAEOA. “Ita lakohi impede, ita mantein katak desizaun sira-ne’e koletiva, la’ós Sekretáriu Terra no Propriedade mak deside, maibé liuhusi konsulta ho komunidade no autoridade lokál. Komunidade lamenta bele hato’o reklamasaun ba Servisu Terra nian”, nia sujere.
Marcelino Coro haktuir katak iha lei hateten rai ne’ebé besik mota, tasi-ninin no lagoa ne’e pertense ba Estadu mak administra no fatin ne’e rai abandonadu, entaun ne’e administra husi Estadu.
Jornalista: Abílio Elo Nini
Editora: Maria Auxiliadora
