iklan

DESPORTU, HEADLINE, MUNISÍPIU, OÉ-CUSSE (RAEOA)

Kuda 24 konsege tama finál kompetisaun Corrida Cavalo iha Oé-Cusse

Kuda 24 konsege tama finál kompetisaun Corrida Cavalo iha Oé-Cusse

Kompetisaun “Corrida cavalo" faze finál nian iha Oé-Cusse hodi komemora loron restaurasaun independénsia 20 maiu 2024, segunda (20/05). Imajen Tatoli/ Abílio Elo Nini.

OÉ-CUSSE, 21 maiu 2024 (TATOLI) – Kuda hamutuk 24 konsege tama faze finál iha kompetisaun Corrida Cavalo iha Rejiaun Administrativa Espesiál Oé-Cusse Ambeno (RAEOA), hafoin halakon kuda 15 iha faze inísiu to’o kuarta finál.

Notísia relevante: Kuda 39 iha Oé-Cusse kompete iha Corrida Cavalo hodi komemora loron Restaurasaun Independénsia

Prezidente Asosiasaun Corrida Cavalo Oé-Cusse Ambeno (AKKOA), Mário Muni Salu, esplika, kompetisaun ne’e realiza ho objetivu tolu, primeiru atu harame komemorasaun loron Restaurasaun Independénsia 20 maiu, segundu atu hamoris fila-fali kultura Corrida kuda iha Oé-Cusse, tanba tinan barak la realiza kompetisaun kuda.

Objetivu terseiru, hanesan desportu komunitária iha Oé-Cusse presiza promove atu sai hanesan indústria ida iha RAEOA, nune’e bele kompete.

“Primeiru atu komemora loron Restaurasaun Independénsia 20 Maiu, segundu mai hanoin katak atu hamoris fali kultura kompetisaun Corrida Cavalo (Bikase-Hopu), tanba tinan barak ona nunka akontese tanba ami laiha kampu, dalaruma ami halai iha mota laran no tasi-ninin, maibé sira-husi sub-rejiaun Pássabe halai iha foho-leten,” Mário Muni Salu, ko’alia iha monument Lifau, Oé-Cusse, segunda ne’e.

Objetivu terseiru, hanoin katak kuda ne’e sai hanesan desportu komunitária iha Oé-Cusse presiza promove atu sai hanesan indústria ida iha RAEOA, nune’e bele kompete iha atividade ne’e, tanba iha akompaña loron hirak iha eventu ne’e, ema barak hakarak partisipa hodi haree kuda, nia impaktu, osan barak mak sirkula transporte sira hetan osan, fa’an sasán hetan osan.

Prezidente  Asosiasaun Corrida ne’e, apela ba kuda na’in-sira atu kontinua prepara, haki’ak no kontinua treinu tanba iha komemorasaun loron proklamasaun unilaterál 28 novembru 2024 ne’e sei realiza tán, hodi loke ba munisipíu 12 inklui husi kuda sira husi provínsia Nusa Tenggara Timur (NTT)

Notísia relevante: FOTO ATUÁL: Kompetisaun finál “Corrida cavalo” iha Oe-Cusse

Prezidente Autoridade RAEOA, Rogério Tiago Lobato, konsidera kompetisaun kuda halai taru, nu’udar desportu tradisionál desde bei-ala sira husik hela husi jerasaun ba jerasaun.

Maibé daudaun ne’e kuaze atu lakon ona, nune’e presiza tau prioridade hodi promove ba jerasaun foun sira iha ámbitu komemorasaun loron istóriku sira.

“Programa ne’e di’ak tanba halo ema hotu kontenti atu selebra ita-nia loron Restaurasaun Independénsia, povu Oé-Cusse presiza atividade sira hanesan ne’e atubele halo ema hotu hamutuk, nune’e bele hasai Oé-Cusse husi izolamentu,” Rogério Tiago Lobato, ko’alia iha suku Lifau.

Tuir nia, desportu kurrida iha Oé-Cusse foin mak ativa fali, hafoin paradu kuaze tinan 10 ona,  tán ne’e ohin foin inísia, hanesan pasu ida komesa hakat ba oin.

“Ha’u sente katak ne’e di’ak tebes, tanba kuda halai ne’e halo ema barak entusiazmu, halo ema barak partisipa, ba oin ita sei buka fatin ida halo konstrusaun ida permanente, atu labele halai kuda ne’e iha tinan ida dala ida, maibé ita tenke halo kuda ne’e sai atividade negosíu, halo ema bele taru, no ema husi rai viziñu bele tama mai,” nia promete.

Notísia relevante:Autoridade RAEOA aloka rihun $37 komemora 20 Maiu ho desportu komunitária

Entretantu, kompetisaun ne’e abertura iha loron 15 maiu ho kuda hamutuk 39 inklui kuda inan haat, mai husi sub-rejiaun Oésilo Pássabe, Nítibe no Pante Makasar.

Prémiu ne’ebé komisaun organizadora prepara hamutuk osan rihun $5, ne’ebé hetan apoia másimu husi Autoridade RAEOA, hodi oferese ba manán na’in-primeiru lugár hetan $400,00, segundu lugár $300,00 terseiru lugár $250,00 kuartu lugár $150,00, kintu lugár $100,00 no sestu lugár $50.

Tuir mai kona-bá kuda manán sira hamutuk 24 mak hanesan, iha klase A primeiru lugár kuda Boen-Ana Bitimu husi suku Abani, sub-rejiaun Pássabe, segundu kuda Feotmese Bimutis husi suku Costa, sub-rejiaun Pante Makasar, tersieru kuda Colo husi Usitaqueno sub-rejiaun Oésilo, kuartu kuda Panle’o Tono Infein husi Costa, kintu kuda Bintang Timor  husi suku Costa no ikusliu kuda  Tamasan Noapai husi Cunha, sub-rejiaun Pante Makasar.

Klase B primeiru lugár kuda Tsule’o Paineno husi suku Abani, sub-rejiaun Pássabe, segundu kuda Kaba Mnasi husi suku Costa, sub-rejiaun Pante Masakar, terseiru kuda Tsule’o Bimese husi suku Abani, sub-rejiaun Pássabe, kuartu kuda Tefneno Paineno husi suku Abani, kintu  kuda Falo Bisila husi suku Naimeko, sub-rejiaun Pante Makasar no ikusliu kuda Leo Sa’e husi suku Bobometo, sub-rejiaun Oésilo.

Klase C primeiru lugár kuda Anin Salu Mata, husi suku Naimeko, sub-rejiaun Pante Makasar, segundu kuda Sun Leo Nalopo husi suku Abani, sub-rejiaun Pássabe, terseiru kuda Tau Fuka husi suku Usitasa’e sub-rejiaun Oésilo, kuartu kuda Lete Bitimo husi suku Abani, sub-rejiaun Pássabe, kintu kuda Kolo Sila Kolo Kotos husi Lela-Ufe, sub-rejiaun Nítibe no ikusliu kuda Haek Ana Bitimo husi Abani sub-rejiaun, Pássabe.

Klase D primeiru lugár kuda Tefneno Nalopo husi suku Abani, sub-rejiaun Pássabe. Segundu kuda Tony Falo husi suku Costa, sub-rejiaun Pante Makasar, terseiru kuda Ma’as Paineno husi suku Abani, kuartu kuda Ansusu Noapai husi suku Cunha, kintu kuda Sol Pah husi suku Costa no ikusliu kuda Nina Bonita husi suku Bobometo sub-rejiaun Oésilo.

Jornalista: Abílio Elo Nini

Editór: Evaristo Soares Martins

iklan
iklan

Leave a Reply

iklan
error: Content is protected !!