OÉ-CUSSE, 11 Dezembru 2024 (TATOLI) – Komunidade husi aldeia Lakufoan no Oétfo, iha suku Costa, sub-rejiaun Pante Makasar, husu ba Autoridade Rejiaun Administrativa Espesiál Oé-Cusse Ambeno (RAEOA) atu halo reabilitasaun ba estrada ligasaun entre aldeia rua ne’e.
Xefe suku Costa, Francisco Colo, hateten jeografikamente suku Costa nia área luan tebes, liuliu aldeia Lakufoan no Oétfo, ne’ebé dook no antes ne’e sai prioridade iha suku Costa atu transforma aldeia rua ne’e sai suku foun iha governasaun ida-ne’e.
Aleinde reabilita estrada, autoridade lokál ne’e aprezenta mós preokupasaun seluk maka kona-ba estabelesimentu fatin ba atendimentu saúde ba populasaun iha aldeia Oétfo tanba Lakufoan iha ona.
Preokupasaun seluk mak iha área edukasaun mak estabelese eskola bázika iha aldeia rua ne’e, tanba daudaun alunu sira la’o ho distánsia dook. “Kona-ba infraestrutura bázika, ba aldeia rua ne’e presiza mak estrada ligasaun entre aldeia Oétfo no Lakufoan. Ohin, ita haree rasik dalan sa’e mai no agora tempu udan susar tebes ba komunidade sira atu asesu ho di’ak. Ida-ne’e urjentemente tanba ba futuru aldeia rua ne’e sei sai suku foun”, Francisco Colo hato’o.
Nu’udar xefe suku nia preokupa tebes, tanba durante ne’e iha de’it estrada ligasaun ho suku Bobokase no Naimeko, maibé ba aldeia rua ne’e laiha. “Bainhira Governu atu mai vizita karik sei haleu suku rua, Bobokase no Naimeko mak bele mai to’o aldeia Lakufoan ho Oétfo, entaun husu autoridade presiza konsidera”, dehan.
Kestaun seluk mak ba merkadu ba produtu lokál, tanba aldeia rua ne’e koñesidu to’o nasionál, tanba iha kooperativa Kafe Lakufoan no komunidade aldeia rua ne’e kada tinan prodús no kuda kafe barak, maibé merkadu mak la favorese ba sira-nia atividade ne’e.
Hatán ba rekomendasaun sira ne’e, Sekretáriu Rejionál ba Asuntu Administrasaun, André Lao, nu’udar Prezidente Autoridade ein ezersisíu, rekoñese katak nia parte sei hato’o ba Prezidente Autoridade RAEOA, Rogério Lobato, nune’e bele konsidera.
“Estrada liga bá Lakufoan ita haree balun di’ak, tanba programa PNDS mak nahe ho simentu, maibé iha balun presiza hadi’a, liuliu dalan bá Oétfo no agora udan, susar tebes atu ultrapasa ho di’ak. Ita sei hato’o ba Prezidente Autoridade, tanba estrada barak mak presiza halo manutensaun”, nia dehan.
Notísia relevante: Rogério Lobato promete rezolve problema infraestrutura bázika iha sub-rejiaun sira
Aldeia Lakufoan iha totál uma-kain 185 ho populasaun 768 no aldeia Oétfo iha família 447 ho totál populasaun 2.423, ne’ebé daudaun ne’e prepara aan atu sai suku foun.
Jornalista: Abílio Elo Nini
Editora: Maria Auxiliadora
