OÉ-CUSSE, 04 Dezembru 2024 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Rogério Tiago Lobato, promete sei rezolve problema infraestrutura bázika iha sub-rejiaun sira, liuliu estrada no bee-moos.
Eis-Ministru Interiór ne’e hato’o bainhira hala’o diálogu ho komunidade iha suku Bobometo, Usitasa’e no Usitaqueno iha sub-rejiaun Oésilo, tersa ne’e.
“Ha’u mai ho sekretáriu rejionál sira, tanba povu komesa pergunta tanba saida mak infraestrutura bázika sira seidauk rezolve? Estrada aat hela de’it, maibé ita komesa halo, ateru de’it mós laiha problema. Ita seidauk iha osan atu halo konstrusaun ba estrada, tanba osan ne’ebé iha, ita tenke selu tusan sira hahú kedas 2017 to’o agora”, Rogério Lobato dehan.
Nia promete katak tinan oin sei halo buat barak no espera katak to’o fin 2025 estrada sira iha foho ne’e bele taka hotu ona kuak sira atu fasilita ema no transporte sira bele la’o bá-mai ho di’ak. Tanba ne’e, autoridade tau atensaun maka’as ba estrada, bee-moos no edukasaun.
Iha biban ne’e, prezidente autoridade esplika kona-ba objetivu husi nia vizita bá iha sub-rejiaun Pássabe no Oésilo, tanba kumpre orientasaun Primeiru-Ministru, Xanana Gusmão, atu haree komunidade sira iha suku no aldeia.
“Ita-nia primeiru-ministru dehan durante ne’e administrasaun RAEOA konsentra de’it atensaun ba iha Pante Makasar, entaun ita labele konsentra de’it iha kapitál, tenke vizita suku sira, tan ne’e mak ohin ha’u mai hakarak selebra 28 Novembru ho komunidade Oésilo atu fahe ita-nia kontente hamutuk ho povu iha foho. Ita mai lori ho divertimentu”, nia hateten.
Notísia relevante: Rogério Lobato halo diálogu ho komunidade iha Pássabe
Jestór sub-rejiaun Oésilo, Benedito Ulan, afirma iha vizita ne’e komunidade hato’o direita sira-nia preokupasaun no rekomendasaun sira, liuliu ba asuntu dezenvolvimentu nian.
“Iha Oé-cusse problema barak akontese, liuliu falta bee-moos, estrada, saúde, edukasaun, tanba iha fatin balun la asesu, inklui iha liña fronteira tanba Oésilo viziñu ho rai sorin. Tanba ne’e, ami espera katak ho problema sira-ne’ebé komunidade enfrenta iha Oésilo, autoridade bele alista no tau ita planu atu rezolve iha futuru, karik presiza apoia imediata”, dehan.
Notísia relevante: Jestór sub-rejiaun sira husu Governu reforsa infraestrutura bázika
Tuir ajenda, Prezidente Autoridade RAOEA sei hala’o vizita mós suku lima iha sub-rejiaun Nítibe iha loron 04 Novembru nu’udar kompromisu husi autoridade atu selebra Loron Proklamasaun Independénsia ho populasaun sira.
Jornalista: Abílio Elo Nini
Editora: Maria Auxiliadora
