COVALIMA, 11 Dezembru 2024 (TATOLI) – Komisaun Nasionál ba Eleisaun (CNE, sigla portugés) introdús prosesu Lei Eleisaun Munisipál no Podér Lokál ba komunidade iha suku Camnasa, postu administrativu Suai, munisípiu Covalima, hodi prepara ba eleisaun kámara munisipál.
Edukasaun Sívika ne’ebé organiza husi CNE ne’e ho tema “Hamutuk konsolida demokrasia iha eleisaun ba podér lokál ne’ebé partisipativu no inkluzivu no promove partisipasaun inkluziva iha eleisaun munisipál”.
“Ami realiza edukasaun sívika ho intensaun atu habelar informasaun liga ba prosesu eleisaun ba kámara munisipál, tanba liuhusi edukasaun sívika mak ita-nia eleitór sira bele iha koñesimentu kona-ba lala’ok eleisaun”, Xefe Departamentu Administrasaun, Finansa no Lojístika, Margarida dos Santos, dehan iha suku Camnasa, ohin.
Ho programa ne’e, bainhira realiza eleisaun kámara munisipál, eleitór sira hatene ona lala’ok sufrájiu no sira iha intrese atu kandidata aan iha eleisaun, nune’e sira mós halo ona preparasaun.
CNE iha kompeténsia no responsabilidade atu halo edukasaun sívika kona-ba Lei Podér Lokál ba komunidade no nia alvu prinsipál ba partidu polítiku sira, tanba sira mak sai na’in ba iha prosesu eleisaun.
Hafoin finaliza edukasaun sívika iha Camnasa, tuir oráriu, iha loron 12 Dezembru, CNE kontinua partilla programa ne’e ba estudante husi Eskola Sekundária Jerál Katólika Ave Maria Suai.
Reprezentante Administradór Postu Suai, Augusto Borges, reforsa katak programa edukasaun sívika ne’e importante ba komunidade no nia konvida ema hotu partisipa ho di’ak iha atividade ne’e.
“Realizasaun eleisaun kámara munisipál liuhusi prosesu kompetisaun. Ho programa edukasaun sívika, Covalima labele lakon ho munisípiu sira seluk hodi prepara rekursu umanu no seluk tan”, dehan.
Partisipante Aquilina Barros Calao dehan bainhira CNE halo edukasaun sívika mak ema bele komprende kona-ba lala’ok eleisaun nian no ho programa ida-ne’e bainhira realiza eleisaun sei la’o ho di’ak.
Notísia relevante: Autoridade Covalima kria uluk kondisaun hodi prepara ba implementasaun kámara munisipál
Jornalista: Celestina Teles
Editora: Maria Auxiliadora
