DILI, 11 Dezembru 2024 (TATOLI) – Governu aprova ona data fixa sira ba realizasaun Asembleia Aldeia no Konsellu Suku, ne’ebé aprezenta husi Ministru Administrasaun Estatál, Tomás do Rosário Cabral.
“Konsellu Ministru aprova projetu dekretu Governu nian, ne’ebé fiksa data sira realizasaun Asembleia Aldeia no Konsellu Suku, iha ámbitu prosedimentu eleisaun líder komunitáriu sira nian”, informa nota ne’ebé Tatoli asesu liuhusi Portál Governu.
Dokumentu ne’e esplika katak diploma ida-ne’e kumpre saida maka temi iha artigu 92.º husi Lei n. 9/2016, loron 8 fulan-Jullu, hahú prosesu eleisaun ba líder komunitáriu sira iha Suku Ueru Mata (Laga, Baucau), Builai (Baucau, Baucau), Caibada Macasa’e (Baucau, Baucaun, Assui-Lau (Letefoho, Ermera), Koliate Lewen (Hatolia A, Ermera), Poetete Vila (Ermera, Ermera), Poetete Lodudu (Ermera, Ermera), Macadique de Cima (Uato -Lari, Viqueque) no Macadique de Baixo (Uato-Lari, Viqueque).
Liuhusi dekretu Governu ida-ne’e aprova mós kalendáriu eleisaun ba Xefe Suku Baduro (Lautém, Lautém), Laku-Mesak (Laclo, Manatuto), Iliheu (Manatuto Vila, Manatuto) no Poetete (Ermera, Ermera).
Konsellu Suku sira hala’o sorumutu iha loron 10 fulan-Janeiru 2025, hodi hili membru sira ba meza eleitorál no simu kandidatura ba xefe suku.
Komunikadu ne’e salienta katak Asembleia Aldeia sira sei hala’o iha loron 25 Janeiru 2025, hodi hili membru meza eleitorál, aprezenta no vota kandidatura sira ba Delegadu Konsellu Suku, Xefe Aldeia no Xefe Suku sira, aleinde hala’o kontajen no verifikasaun inisiál ba rezultadu sira, nomós análize ba rekursu ne’ebé iha relasaun ho desizaun eleisaun nian.
“Karik laiha kandidatu Xefe Suku ne’ebé maka hetan votu válidu liu metade ne’ebé fó-sai, Asembleia Aldeia sira sei hasoru malu, hodi hala’o votasaun daruak iha loron 10 fulan-Fevereiru tinan 2025”, dehan.
Konsellu Suku sira sei hasoru malu iha 26 Janeiru 2025 hodi akompaña apuramentu finál ba rezultadu eleisaun Xefe Suku sira, deside kona-ba rekursu ruma no fó-sai rezultadu finál. “Karik akontese votasaun daruak, sei hala’o reuniaun foun iha loron 11 fulan-Fevereiru tinan 2025 ba objetivu ne’ebé hanesan kona-ba volta daruak nian”, esplika.
Konsellu Suku sira sei hasoru malu iha loron 5 Fevereiru 2025 atu hili Lian-na’in no Reprezentante Juventude sira ba Konsellu Suku. Bainhira akontese votasaun daruak ba Xefe Suku sira, eleisaun ba figura sira-ne’e sei hala’o iha loron 21 Fevereiru 2025.
Notísia relevante: STAE hahú prepara eleisaun suku foun iha Baucau
Jornalista: Osória Marques
Editora: Maria Auxiliadora
