DILI, 11 dezembru 2024 (TATOLI)—Komisaun A trata asuntu Justisa no Konstituisionál iha Parlamentu Nasionál (PN) sei tau prioridade diskute projetu ka proposta-lei rekoperasaun bainhira iha inisiativa aprezenta.
Notísia Relevante: Komisáriu CAC husu Governu inisia projetu lei kona-ba rekoperasaun ativa
Vise Prezidente Komisaun A, António Verdiál de Sousa, hateten presiza duni iha lei komplementár kona-ba rekoperasaun ativa hodi apoiu serbisu Komisaun Anti-Korrupsaun (CAC, siglá portugés), nune’e bainhira Governu aprezenta inisiativa mai iha órgaun lejisladór ne’e mak komisaun ne’ebé trata asuntu justisa no konstituisionál sei tau prioridade hodi diskute.
“Loos duni bainhira iha sorumutu ho CAC, sira husu duni no sira mós prepara hela lei komplementár ne’ebé sei lori ba Governu aprova. Nune’e, iha PN, Deputadu hotu hanesan lejisladór atu aprezenta proposta inisiativa lei,” Nia hateten ba Agência TATOLI iha resintu PN.
Antes ne’e, Komisáriu CAC, Rui Perreira dos Santos, husu Governu atu bele inísia projetu-lei rekuperasaun ativa atu bele fó bibán ba CAC hodi sita patrimóniu korruptór ida bainhira Tribunál deklara katak nia ne’e kondenadu duni ba hahalok korrupsaun.
Rekorda fali katak, projetu-lei ne’e uluk lori ona ba PN atu diskute maibé to’o ikus inisiativa ne’e kaduka tiha.
Jornalista : Nelson de Sousa
Editór : Cancio Ximenes
