DILI, 11 Dezembru 2024 (TATOLI) – Governu liuhusi Reuniaun Konsellu Ministru aprova ona Programa Estratéjiku ba Kooperasaun Timor-Leste no Portugál.
Projetu Rezolusaun Governu nian ne’e aprezenta husi Ministru Negósiu Estranjeiru no Kooperasaun, Bendito dos Santos Freitas, ne’ebé formaliza Programa Estratéjiku ba Kooperasaun país frua ne’e ba períodu 2024-2028, ne’ebé asina iha Lizboa iha 14 Outubru 2024.
“Programa ne’e ho objetivu atu hametin parseria entre nasaun rua ne’e, bazeia ba sira-nia afinidade istórika, kulturál no linguístika, no aliña ho kompromisu globál sira, hanesan Ajenda Nasaun Unida 2030, Estratéjia Kooperasaun Portugeza 2030, Planu Estratéjiku Dezenvolvimentu 2011-2030 no planu estratéjiku nasionál no sektorál sira seluk ho objetivu atu kontribui ba dezenvolvimentu sustentavel Timor-Leste nian”, informa nota husi Governu.
Aleinde ne’e Konsellu Ministrus aprova mós projetu Rezolusaun Governu nian rua, ne’ebé aprezenta mós husi Ministru Negósiu Estranjeiru, relasiona ho aprovasaun Akordu Kooperasaun entre Timor-Leste no Portugál iha Área Infraestruturas no Protokolu Kooperasaun entre Ministériu Turizmu no Ambiente Timor-Leste no Ministériu Ekonomia Repúblika Portugeza ba Dezenvolvimentu no Implementasaun Programa REVIVE. Dokumentu rua ne’e asina iha Lizboa, iha 14 Outubru 2024.
Akordu Kooperasaun iha área infraestrutura sira sei permite Timor-Leste hetan benefísiu husi parseria ho instituisaun públika portugés sira, ne’ebé kontribui ba implementasaun no dezenvolvimentu infraestrutura esensiál sira ba servisu públiku báziku ne’ebé presta ba populasaun.
Protokolu Kooperasaun ba Dezenvolvimentu no Implementasaun Programa REVIVE ho objetivu atu promove no halais prosesu rekuperasaun, prezervasaun no rentabilidade patrimóniu públiku ho valór patrimoniál, kulturál, istóriku no arkitetóniku aas, nune’e ninia transformasaun sai hanesan ativu ekonómiku ba benefísiu nasaun nian, hodi halo ida-ne’e sai apropriadu ba atividade ekonómika sira ne’ebé iha relasaun ho setór turizmu.
Notísia relevante: KM fó poder ba Ministru Kalbuadi asina kooperasaun programa REVIVE ho Portugal
Jornalista: Osória Marques
Editora: Maria Auxiliadora
