KM fó poder ba Ministru Kalbuadi asina kooperasaun programa REVIVE ho Portugal
DILI, 02 outubru 2024 (TATOLI)— Governu liuhusi reuniaun ordinária Konsellu Ministru (KM), kuarta ne’e, delibera hodi fó podér tomak ba Vise Primeiru-Ministru, Ministru Koordenadór Asuntu Ekonómiku no Ministru Turizmu no Ambiente, Francisco Kalbuadi Lay, atu asina protokolu kooperasaun entre Governu Repúblika Portugeza no Governu Repúblika Demokrátika Timor-Leste ba dezenvolvimentu no implementasaun programa REVIVE.
“Inisiativa ida-ne’e ho intensaun atu promove no halais prosesu rekuperasaun, prezervasaun no rentabilidade patrimóniu públiku ho valór patrimoniál, kulturál, istóriku no arkitetóniku ne’ebé a’as, no nia transformasaun ba patrimóniu ekonómiku ida ba benefísiu nasaun nian, liu-liu komunidade iha rejiaun sira ne’ebé inklui iha laran,” referidu nota ne’ebé Agência Tatoli asesu hafoin reuniaun ezekutivu iha Palásiu Governu.
Notísia relevante : Timor-Leste no Portugal komprometidu reforsa kooperasaun bilaterál
Modelu báziku programa REVIVE nian envolve rekuperasaun imovél sira, liuhusi inisiativa públika no investimentu privadu, nune’e imovél sira ne’e adekuadu ba atividade ekonómika sira ne’ebé iha relasaun ho setór turizmu, iha ninia aspetu hotu-hotu, liu-liu turizmu kulturál, ekolójiku, termál, foho ka turizmu azúl, ho objetivu atu valoriza, rekupera no konserva patrimóniu ida-ne’e, no mós sustentabilidade ambientál, sosiál no ekonómika hosi rejiaun sira ne’ebé inklui iha laran.
Tuir Objetivu Dezenvolvimentu Sustentável, programa ne’e sei kobre imovél 14 iha Timor-Leste, ho objetivu atu fó benefísiu ba komunidade lokál sira no promove sustentabilidade sosiál, ekonómika no ambientál.
Akordu ne’e sei iha durasaun inisiál tinan-rua no automátikamente bele renova.
Iha faze dahuluk sei inklui imovél sira husi Pouzada Tutuala, iha Lautein, Pouzada Maubisse iha Ainaro, husi Pozada Same iha Manufahi, Pouzada Manatuto iha Manatuto, Bee-manas Marobo iha Bobonaro; Forte Maubara iha Liquiçá, Alfándega Beaço iha Viqueque, postu administrativu Fohorem nian iha Suai-Covalima; no Rezidénsia Administradór iha Pante Macassar iha Oé-cusse Ambeno.
Iha faze daruak, sei inklui imóvel sira husi Pouzada Vila Maria no Pouzada Hatubuiliku iha Ainaro, Armazen Kafé Fatubesi iha Ermera, Ospitál Portugés Antigu iha Viqueque no postu administrativu Iliomar iha Lautém.
Iha biban hanesan, Ministru Obras Públika, Samuel Marçal, aprezenta mós akordu kooperasaun entre Repúblika Portugal no Repúblika Demokrátika Timor-Leste iha área infraestrutura nian, ne’ebé hakarak promove instrumentu direitu internasionál ida ne’ebé permite hametin liután kooperasaun entre entidade sira ne’ebé responsavel ba área infraestrutura nasaun rua nian.
Parseria ne’e sei kobre área sira hanesan enjeñaria sivíl, ordenamentu territóriu no urbanizmu, abitasaun, infraestrutura ponte no estrada, portu no aeroportu nian nomos instalasaun sira ne’ebé relasionadu, telekomunikasaun, eletrisidade no bee no saneamentu.
Akordu ne’e prevee mós fahe koñesimentu, troka tékniku sira no apoiu ba konsolidasaun institusionál no regulatóriu Timor-Leste nian.
Jornalista : Osória Marques
Editora : Julia Chatarina
