SEF aloka rihun $10 hodi responde ba nesesidade rusa sira iha illa Jaku
DILI, 25 Agostu 2026 (TATOLI) – Sekretaria Estadu Floresta (SEF) prevee, iha tinan ne’e, orsamentu rihun $10 hodi responde ba nesesidade bibi-rusa sira iha illa Jaku, iha munisípiu Lautein.
Sekretáriu Estadu Floresta, Fernandinho Vieira, hatete daudaun tama ona ba tempu bailoro naruk ka situsaun El Niño, ne’ebé sei afeta mós ba hahán rusa sira iha Jaku.
Nia dehan kona-ba bee ba rusa sira daudaun disponivel ona, tanba iha ne’ebá transforma tasi-been ba bee-midar ne’ebé enxe ba tanke bee neen, ne’ebé kada loron fornese ba rusa sira.
“Ita-nia rusa sira ne’ebé daudaun iha ne’ebá hamutuk 350 to’o 400 kabesa. Kondisaun agora menus ona ai-han, maibé ita prevee orsamentu hamutuk rihun $10 hodi responde ba sira-nia hahán, ita sosa du’ut sira lori husi rai-boot bá Jaku”, Fernandinho Vieira realsa, ohin.
Tuir nia, du’ut ne’ebé rusa sira presiza han mak hanesan hali-tahan, batar Bafo Kayrala nia tahan, no seluk tan. Ida-ne’e guarda floresta serbisu hamutuk ho peskador sira iha Tutuala mak lori bá fó rusa han.
“Totál guarda floresta ne’ebé daudaun iha hamutuk 271, husi númeru ne’e iha Jaku ita destaka na’in-neen. Iha ne’ebá sira kuidadu rusa atu ema labele kasa no kuidadu floresta nune’e ema labele estraga”, nia esplika.
Governante ne’e mós apela ba komunidade sira atu labele estraga animál no floresta iha Jaku, nune’e bele atrai turista sira. Aleinde ne’e, kuidadu mós ambiente iha fatifatin, liuliu labele sunu rai arbiru.
Notísia relevante: Parlamentu alerta prezerva Parke Nasionál Nino Konis Santa
Jornalista: Arminda Fonseca
Editora: Maria Auxiliadora
