Tatoli promove koñesimentu no literasia mídia liuhusi sertame ba estudante sekundária

DILI, 25 Agostu 2026 (TATOLI) – Ajénsia Notisioza Timor-Leste – Tatoli Institutu Públiku (Tatoli, I.P) realiza sertame entre estudante sekundáriu ho tema “Ezisténsia Tatoli” iha era globalizasaun informasaun no modernizasaun dijitál, Tatoli, I.P sai mós baze sentrál hodi kombate hoax no otimiza literasia mídia nian.

Prezidente Konsellu Diretivu Tatoli I.P, Noémio Falcão, iha abertura ba eventu ne’e kumprimenta manorin-na’in sira husi eskola idaidak no hato’o benvindu ba estudante sira ne’ebé partisipa.

“Ha’u hato’o boas-vindas no agradese ba ita-boot sira hotu ba prezensa no partisipasaun iha atividade ida-ne’e”, nia dehan iha Faról, ohin.

Dirijente ne’e dehan atividade sertame ida-ne’e nu’udar parte ida husi programa lubuk ne’ebé Tatoli, I.P. organiza hodi selebra aniversáriu ba da-10 Tatoli nian, ne’ebé marka ho tema “Inovasaun, Krebilidade no Transformasaun Dijitál”, ne’ebé hala’o ona iha loron 27 Jullu 2026.

Tatoli nu’udar ajénsia notisioza Estadu nian, iha mós responsabilidade atu fornese informasaun ne’ebé loos, fornese informasaun ne’ebé loos konfiavel no responsavel.

“Iha era dijitál ida-ne’e, dezafiu boot ne’ebé ita hotu hasoru maka oinsá ita bele uza no komprende informasaun ho matenek, liuliu iha informasaun falsa no dezinformasaun fásil liu atu da’et”, hatete.

Tanba ne’e, tuir nia, atividade sertame ida-ne’e la’ós de’it atu buka vensedór, maibé mós atu promove koñesimentu, leitura, hanoin krítiku no interese estudante sira-nian ba informasaun no jurnalizmu.

Nia enkoraja estudante hotu atu partisipa ho entuziasmu, onestidade no espíritu kompetisaun ne’ebé saudavel. “Espera katak, atividade ida-ne’e bele sai motivasaun ba ita-boot sira atu kontinua aprende no sai joven responsavel iha era dijital”, nia hato’o.

Eskola São Pedro sai vensedór

Sertame ne’e loloos partisipa husi eskola sekundária neen hanesan São Miguel Arcanjo, São Pedro, Kristál, maibé Eskola Sekundária Jerál 10 Dezembru, Inácio Loiola, Esternatu São José la partisipa.

Ekipa júri prepara matéra lima hanesan ezisténsia Tatoli, Konstituisaun, jeografia nasionál no Asosiasaun Nasaun Sudeste Aziátiku (ASEAN,sigla inglés), literasia mídia no edukasaun sívika.

Durante kompetisaun estudante husi São Pedro mak hetan klasifikasaun primeiru lugar ho valór 1.705, São Miguel 725 no Kristal ho valór 673.

Reprezenta estudante husi São Pedro, Fatonio Fátima Orlando da Costa, orgullu tebes tanba bele hetan hetan primeiru lugar. “Ha’u sente orgullu tebes no obrigadu ba Tatoli, tanba bele konvida ona ami-nia eskola atu tuir sertame ida-ne’e”, dehan.

Nia husu ba estudante hotu, liuliu hirak ne’ebé tuir kompetisaun atu labele lakon esperansano nafatin esforsu atu estuda. “Maski ita lakon iha sertame, maibé ita nafatin manán esperiénsia”, nia dehan.

Profesora husi eskola São Pedro, Alzira Fernandes Jerónimo, apresia ho programa Tatoli nian ho tema ne’ebé iha no di’ak tebes ba situasaun ohin loron no husu atu ba oin kontinua nafatin.

Suzana Santos Ribeiro, estudante husi São Miguel, mós kontente ho esforsu ne’ebé iha bele hetan rezultadu di’ak maski hetan de’it segundu lugar.

Tuir nia, tema ba sertame ne’ebé iha fó hanoin no enkoraja joven sira bele utiliza mídia ho loloos.

Kona-ba prémiu komisaun sei fó sai no entrega ba manán sira iha loron 28 fulan-Agostu iha edifísiu Tatoli, Faról, Dili.

Jornalista: Nelson de Sousa

Editora: Maria Auxiliadora