MF avalia pedidu kapitál menór tuir prioridade Governu ba OJE 2027
DILI, 25 Agostu 2026 (TATOLI) – Ministériu Finansa (MF) iha Orsamentu Jerál Estadu (OJE) 2027 la fó prioridade direta ba alokasaun kapitál menór ba ministériu sira, tanba tenke haree uluk nesesidade no programa sira ne’ebé konsidera nu’udar prioridade Governu nian ba tinan oin.
Ministra Finansa, Santina Cardoso, esplika katak la fó tetu iha kapitál menór tanba ekipamentu sira ne’e la signifika kada tinan ministériu sira tenke hetan alokasaun orsamentu atu sosa. Tanba ne’e, iha tinan ida-ne’e tenke haree filafali pedidu sira ne’ebé ministériu no instituisaun sira hato’o, inklui razaun no objetivu husi sosa ekipamentu ne’e no bele ajuda ba programa saida.
Tuir nia, MF la’ós korte totalmente alokasaun ba kapitál menór, maibé sira-nia subvensaun sira hatama lista no saida mak sira-nia nesesidade atu sosa.
“Kapitál menór ba tinan oin nian ita la’ós korte maibé ita la fó ministériu sira. Ita husu sira ne’ebé iha pedidu ka subvensaun atu sosa ekipamentu, sira hatama mak ita halo análize, hotu mak ida ne’ebé prioridade hato’o ba Komisaun Revizaun Polítika mak deside, ida-ne’ebé mak prioridade liu apoiu ba programa sira iha 2027”, Santina Cardoso hatete ba Tatoli.
Nia subliña katak dezde reuniaun Komité Revizaun Polítika Orsamentu Jerál Estadu 2027, ministériu balun hatama ona sira-nia pedidu ba MF no rejista ona balun. Maibé, seidauk bele determina loloos instituisaun hira mak hato’o pedidu tanba sei haruka ba Komité mak foti desizaun.
Tuir nia, desizaun kona-ba pedidu sira sei foti iha Komité Revizaun Polítika Orsamentu, tanba OJE 2027 Governu prepara ho prioridade polítika foun no implementa abordajen orssamentu baze zero.
Hodi hatutan katak liuhusi abordajen ida-ne’e, Ministériu Finansa identifika uluk orsamentu duplikatóriu kada entidade públika nian no sei la halo diskusaun, maibé foku liu de’it ba diskusaun ba prioridade polítika Governu nian ne’ebé foun no haree pedidu sira ne’ebé importante tebes atu fó atensaun iha Orsamentu Jerál Estadu.
Notisía relevante: Governu hahú realiza primeira reuniaun Komité Revizaun Polítika ba Orsamentu 2027
Jornalista: Arminda Fonseca
Editora: Maria Auxiliadora
