COVALIMA, 12 Dezembru 2024 (TATOLI) – Konsellu Kombatente Libertasaun Nasionál (CCLN, sigla portugés) disemina informasaun ba veteranu sira iha Covalima kona-ba mudansa estatutu CCLN no Fundu Investimentu Veteranu.
Atividade divulgasaun informasaun ne’e parte ida atu atualiza mudansa estatutu lei númeru 3/2024, loron 12 Juñu, terseira alterasaun ba lei númeru 3/2006 kona-ba Mudansa Estrutura iha CCLN, dekretu-lei númeru 33/2024, loron 18 Outubru, segunda alterasaun dekretu-lei númeru 7/2018, loron 28 Marsu, kona-ba estatutu orgánika CCLN, hametin prinsípiu unidade nasionál liuhusi prinsípiu Fundu Investimentu Veteranu.
“Diseminasaun lei ba veteranu sira ne’e importante. Bainhira halo aprovasaun de’it iha Dili, maibé la halo divulgasaun, laiha funsionamentu, tanba ne’e responsavel sira presiza hatene lei, nune’e bele implementa”, Ministru Asuntu Kombatente Libertasaun Nasionál, Gil da Costa ‘Oan Soru’, dehan iha salaun parokiál Suai, ohin.
Nia salienta katak ho diseminasaun informasaun ne’e estrutura sira labele interpreta estatutu tuir idaidak nia hanoin, tanba sei kria problema ba sira ne’ebé iha estrutura CCLN.
Diseminasaun estatutu CCLN ne’e kona-ba regulamentu prinsipál hodi asegura prosesu rejistrasaun, rekoñesimentu, kondekorasaun, nomós direitu protesaun sosiál ba kombatente libertasaun sira-nia familia.
Divulgasaun ne’e foka liu ba iha artigu 3, alínea 1, kona-ba Patriota Libertasaun Nasionál mak indivíduu sira hotu ne’ebé sofre violasaun direitu umanu tanba luta ba independénsia nasionál.
Iha artigu 10 kona-ba Mártir Libertasaun Nasionál, ne’ebé iha alínea a hateten mártir sira mak militante sira hotu iha luta ba independénsia nasionál ne’ebé mate ou lakon entre 15 Agostu 1975 to’o 31 Dezembru 1978. Iha alínea b, katak militante sira hotu iha luta ba independénsia nasionál ne’ebé mate ou lakon ona iha faze rezisténsia até 25 Outubru 1999.
Aleinde ne’e, divulga mós artigu 12, númeru 2, alínea a, ne’ebé hateten lakon kualidade hanesan kombatente libertasaun nasionál sei implika ba suspensaun imediata ba pagamentu husi pensaun to’o loron tránzitu ein julgadu ho desizaun judisiál kondenatória no lakon mós direitu sira hotu ne’ebé inerente.
Sensisbiliza mós artigu 13, númeru 1 to’o 8, kona-ba rejistu kualidade nu’udar Kombatente Libertasaun Nasionál no artigu 15 kona-ba Prazu ba Rejistu. Iha artigu ne’e katak pedidu abertura foun ba rejistu sei aprova ho dekretu Governu, aprezenta husi membru Governu responsável ba asuntu Kombatente Libertasaun Nasionál ho de’it proposta husi CCLN.
Prezidente Konsellu Munisipal Kombatente Libertasaun Nasionál Covalima, Osório Soares Mausoko, dehan veteranu sira presiza atu rona didi’ak informasaun ne’ebé hato’o iha atividade ne’e. “Ministru nia prezensa atu disemina informasaun sobre estatutu Kombatente Libertasaun Nasionál no polítika investimentu veteranu sira ne’ebé kontribui kada fulan”, dehan.
Iha sorin seluk, Prezidente Autoridade Covalima, Miguel Armada Cardoso, dehan programa ne’e atu fó esklarese ba veteranu sira iha Covalima, tanba durante ne’e hein hela atu rona informasaun no desizaun saida mak atu foti. “Informasaun saida mak ita presiza atu ezekuta iha ita-nia munisípiu, ohin, ita rona direta husi ministru nune’e ita bele la’o tuir”, nia hututan.
Notísia relevante: Governu reforsa kompeténsia CCLN ba Fundu Investimentu Veteranu
Jornalista: Celestina Teles
Editora: Maria Auxiliadora
