COVALIMA, 12 Dezembru 2024 (TATOLI) – Ministru Asuntu Kombatente Libertasaun Nasionál, Gil da Costa ‘Oan Soru’, kontinua orienta kada veteranu atu hakerek nia istória kona-ba luta ba libertasaun nasionál.
“Ha’u husu kada veteranu presiza hakerek nia istória. Maske ita-nia oan sira ki’ak ba rikusoin, maibé labele ki’ak ba ita-nia istória”, Oan Soru dehan iha salaun parokiál Suai, ohin.
Nia esplika razaun veteranu sira presiza hakerek istória rasik, tanba bainhira mate buka istória sei lahetan tanba veteranu própriu mak bele konta, nune’e oan no bei-oan sira bele hatutan kona-ba luta ba libertasaun.
“Timor-Leste rai ne’ebé ki’ik, maibé nia luta bele to’o nia objetivu hodi hetan ukun rasik-aan, nune’e kada pesoál hakerek nia istória, hakerek pájina ida to’o ema rihun ida sai pájina 1.000 hodi sai livru ida, sai istória ba Covalima”, salienta.
Iha sorin seluk, responsavel kaixa Talimorin, Luís Amaral, dehan kada veteranu mak hakerek nia istória maka aban bain-rua oan no bei-oan sira bele konta tuir.
“Ami daudaun ne’e hakerek ona istória pasada. Ami presiza hakerek ho neineik, labele ansi. Ami luta ba libertasaun nasionál no ohin loron ita bele hetan independénsia”, nia haktuir.
Notísia relevante: Oan Soru husu veteranu atu hahú hakerek istória
Jornalista: Celestina Teles
Editora: Maria Auxiliadora
