DILI, 12 dezembru 2024 (TATOLI)—Prezidente Parlamentu Nasionál (PPN), Maria Fernanda Lay, sei ajenda iha plenária hodi bele halo anúnsiu admisaun no baixa projetu-lei ba alterasaun lei Pensaun Vitalísia ba komisaun permamente hodi bele kontinua prosesu tuir mai.
Notísia Relevante: PPN simu ona proposta alterasaun ba lei pensaun vitalisia no iha ona faze konsultasaun
“Ohin, ha’u mós hato’o, ami sei hala’o iha terseira sesaun lejislativa. Draft (ezbosu) iha ona, maibé tenke konsulta tanba pilár haat Estadu hotu-hotu iha pensaun. Agora, se hakarak ka lakoi depende ba maiória. Ha’u hateten ona, draft halo ona, sei hatun ba komisaun kompetente hodi bele haree ida-ne’e hodi halo audénsia públika no konsultasaun,” Prezidente PN ne’e hateten ba jornalista sira hafoin reuniaun líder bankada iha sala konferénsia PN, kinta ne’e.
Mezmu nune’e, PPN seidauk ko’alia kona-ba iha projetu-lei ne’e atu halakon ka hamoos tiha pensaun vitalísia.
“Não sei, ha’u mós seidauk haree. Maibé lei la fó dalan ba direitu adkiridu atu hamoos hotu. Se hamos hotu, veteranu hotu-hotu hamos hotu,” nia dehan.
Hatán kona-ba alterasaun pensaun vitalísia atu integra ba seguransa sosiál hanesan ho inisiativa ne’ebé iha lejislatura dalima maibé kaduka tiha, nia hatán, ida-ne’e sei tetu ba buat barak.
“País seluk depois tinan barak mak foin bele tranzita, tanba ita hatene katak, ita-nia seguransa sosiál rasik mós foin hahú iha 2017. Klaru katak, ita labele iha espetativa hanesan eis titulár ida bele hetan kedas pensaun boot ne’ebé nia tenke akumula. Ligadu ho ne’e, ita-nia eis titulár sira mós maioria idade ona, konserteza nia labele hein depedénsia ba ida-ne’eba sei fó kiik tebes. Ne’ebé, ha’u hanoin tetu ba sasán barak to’o iha momentu ne’eba, ita-boot sira sei públiku debate la’ós eskluzivu ba Deputadu sira de’it,” nia hateten.
Notísia Relevante: https://tatoli.tl/2023/01/30/deputadu-maioria-lakohi-altera-lei-pensaun-vitalisia/
Jornalista : Nelson de Sousa
Editór : Cancio Ximenes
