COVALIMA, 13 Dezembru 2024 (TATOLI) – Asosiasaun Defisiénsia Timor-Leste (ADTL) hamutuk ho Klibur Dezenvolvimentu Sustentavel Timor-Oan (KDESTO) divulga informasaun ba entidade sira iha Covalima kona-ba direitu ba ema ho defisiénsia (EhD).
Sensibilizasaun ne’e foka ba direitu adolesente no importánsia edukasaun ba ema ho defisiénsia sira.
“Ita hatene katak direitu ema ho defisiénsia kuaze barak liu mak lahetan protesaun no promosaun iha aspetu hotu, tanba ne’e mak ami halo sosializasaun foku liu ba adolosente sira no importánsia edukasaun ba ema ho defisiénsia”, Diretór ADTL, Cesário da Silva, dehan iha Kampung Baru, ohin
Nia salienta katak ema hotu hateten labele husik ema ida iha kotuk, maibé la entende oinsá atu envolve EhD, lahatene tipu nesesidade EhD, tanba ne’e presiza sensibiliza informasaun ba entidade relevante sira mak hanesan sentru juventude, sentru formasaun sira, estudante no instituisaun públika sira iha Covalima, nune’e bele iha koñesimentu oinsá envolve EhD.
“Ita-nia intensaun atu aumenta koñesimentu entidade hotu atu sensivel ba EhD oinsá integra sira-nia planu no programa iha kada instituisaun sira”, realsa.
Tuir dadus EhD ho tipu oioin hamutuk rihun 17 no husi númeru ne’e EhD rihun 8-resin mak foin asesu ba edukasaun iha ensinu báziku to’o ensinu superiór, maibé rihun 10-resin seidauk asesu ba edukasaun.
Razaun mak hasoru problema lubuk ida atu asesu ba edukasaun mak hanesan ekipamentu iha eskola, iha impedimentu tanba profesór sira atu hanorin hasoru difikuldade nafatin, laiha asesibilidade hanesan rampa, sitina, no EhD tilun presiza tradusaun ba lian jestuál.
Diretór KDESTO Covalima, Alfredo dos Santos, dehan sensibilizasaun ne’e atu transforma públiku nia hanoin hodi hatene direitu EhD iha inkluzaun sosiál.
“ EhD kuaze lubuk ida mak seidauk iha oportunidade, tanba ne’e ita hamutuk halo advokasia ba parte relavante sira ne’ebé inkluzivu liu hodi tau importánsia ba direitu atu hetan tratamentu hanesan”, nia salienta.
Reprezentante Diretór Edukasaun Covalima, Florindo do Carmo, esplika katak, Edukasaun la taka dalan ba ema ho defisiénsia atu asesu ba eskola sira. “Ha’u-nia oan sira hotu iha direitu atu hetan oportunidade, tanba ne’e husu atu labele moe bá eskola, ta’uk atu hakbesik bá eskola, tanba kondisaun ne’ebé ho defisiénsia ne’e la’ós ita-boot sira-nia hakarak”, nia enkoraja.
Notísia relevante: RHTO Covalima apoia insentivu ba EhD na’in-30
Jornalista: Celestina Teles
Editora: Maria Auxiliadora
