COVALIMA, 10 Dezembru 2024 (TATOLI) – Raes Hadomi Timor-oan (RHTO) Covalima apoia, entre Janeiru no Novembru, insentivu ba ema ho defisiénsia (EhD) na’in-30 iha munisípiu ne’e.
Pontu fokál RHTO Covalima, Rosito Amaral, dehan insentivu ne’e ba EhD fízika no intelektuál, ne’ebé fulan ida apoia ba ema na’in-ida hodi tulun EhD atu asesu bá edukasaun, bá trata dokumentu no halo tratamentu ba sira-nia saúde.
“Subsídiu ba EhD hanesan papél RHTO ne’ebé hetan fundu husi Governu Austrália, liuhusi parseiru Dezenvolvimentu Umanitária iha programa DFAT hodi fó fiar ba RHTO”, Rosito Amaral afirma.
Apoiu insentivu ne’e ba estudante ensinu báziku to’o ensinu sekundáriu hodi ajuda sira-nia inan-aman nia ekonomia hodi sosa materiál eskola nian, nomós selu propina. Entre Janeiru no Novembru ne’e, RHTO disponibiliza ona $2.250 ba EhD, ne’ebé kada ema simu $75.
Tuir dadus, ema ho defisiénsia husi postu administrativu Fatululik, Fatumea, Fohorem, Tilomar, Maucatar Suai no Zumalai hamutuk 1.000-resin.
Benefisiáriu Gaudensiana Ana Gonçalves hanesan defisiénsia fízika husi postu Suai dehan nia simu insentivu husi RHTO hodi halo tratamentu ba saúde iha Ospital Nasionál Guido Valadares (HNGV), liuliu halo terapia.
“Insentivu ne’ebé RHTO fó, ha’u uza atu selu transporte públiku viajen bá-mai, tanba ha’u halo tratamentu saúde, ne’ebé daudaun ne’e iha ona progresu. Insentivu husi RHTO la sufisiente, nune’e aumenta osan privadu hodi halo tratamentu ba saúde”, nia salienta.
Iha sorin seluk, Diretór-Ezekutivu RHTO, Joãozito dos Santos, esplika katak insentivu ne’e husi Department of Foreign Affairs and Trade (DFAT) husi Austrália atu tulun estudante ho defisiénsia ba asesu edukasaun ne’ebé kada ema simu $75 ba tinan ida nian.
Subsídiu ba estudante ne’e membru RHTO identifika EhD mak foin fó apoiu, ne’ebé iha tinan ida fó ba EhD na’in-12 iha kada munisípiu.
“Insentivu ba edukasaun ne’e mak $75 no ida mak ami apoia ba defisiénsia sira asesu ba subsídiu atu trata sira-nia dokumentu, bá sentru reabilitasaun nasionál hodi hetan ekipamentu hanesan kadeira roda, ai-tonka sira ne’e”, salienta.
Orsamentu ne’ebé Governu Austrália disponibiliza, kada tinan, ba RHTO ne’e pur volta rihun 200-resin hodi foka ba edukasaun, saúde no seguransa sosál. Apoiu ne’e dezde Jullu 2021 no sei remata iha Juñu 2026.
Tuir dadus RHTO, benefisiáriu EhD husi Janeiru to’o Novembru hamutuk 448 (feto 201 no mane 245). Asesu ba insentivu husi Pré-Primária to’o Sekundária hamutuk 185 husi munisípiu 13. Trata dokumentu hanesan atestadu médiku, billete identidade, kartaun eleitorál no RDTL hamutuk 183, bá sentru reabilitasaun no HNGV atu hetan ekipamentu no halo terapia hamutuk 80.
“Kada ema atu trata sira-nia dokumentu hamutuk $75 no ba ema atu bá terapia no hetan ekipamentu ne’e $50”, realsa.
Notísia relevante: RHTO Covalima enkoraja família apoia EhD asesu ba edukasaun
Jornalista: Celestina Teles
Editora: Maria Auxiliadora
