DILI, 13 dezembru 2024 (TATOLI)—Prezidente Komisaun D trata asuntu Ekonomia no Dezenvolvimentu iha Parlamentu Nasionál (PN), Ricardo Baptista, kontinua husu Governu liuhusi Sekretária Estadu Formasaun Profisionál no Empregu (SEFOPE) atu iha tinan 2025 fó prioridade altera Lei Traballu númeru 4/2012, loron 21 fulan-fevereiru, hodi hadi’a lei saláriu mínimu ba traballadór sira.
Notísia Relevante: SEFOPE promete altera lei saláriu mínimu iha 2025
“Ami iha ne’e, ko’alia dalabarak ona ho Governu liuhusi SEFOPE iha plenária no audiénsia, atu haree saláriu mínimu,” Nia hateten ba Agência TATOLI iha resintu PN, sesta ne’e.
Tanba, nia dehan, saláriu mínimu ne’e agora iha ne’e haree no liga ba presu sasán nesesidade báziku ne’ebé iha hanoin la relevante tebes.
Maibé, tuir nia, atu hasa’e saláriu mínimu Governu mós presiza haree iha parte hotu tanba hakarak aumenta saláriu mínimu dalaruma presu sasán mós bele aumenta, entaun bele hamosu inflasaun iha Timor-Leste ne’ebé presiza duni tetu didi’ak.
“Ita presiza atu haree duni saláriu mínimu, maibé tenke tetu ba merkadu traballu. Ita hasa’e sasán folin hamosu fali iha inflasaun iha ita-nia rai liuliu mak ita-nia produtu báziku,” nia hateten
Tanba ne’e, nia husu Governu atu bele iha polítika ida di’ak atu haree no justu nune’e traballadór sira hetan renumerasaun naton hodi bele atende nesesidade família ho di’ak.
Deputadu husi bankada CNRT ne’e dehan, Governu responde ona no lori ona lei ne’e ba iha Konsellu Ministru (KM) atu bele haree maibé iha KM diskute pendente hela, nune’e hein iha tinan 2025 kontinua fila-fali haree ba saláriu mínimu.
Jornalista : Nelson de Sousa
Editór : Cancio Ximenes
