OÉ-CUSSE, 13 Dezembru 2024 (TATOLI) – Vise-Ministru Administrasaun Estatál, Jacinto Rigoberto, halo abertura ba torneiu Xanana Cup ne’ebé partisipa husi suku 13 iha Rejiaun Administrativa Espesiál Oé-Cusse (RAEOA).
Torneiu ne’e realiza iha kampu futeból Oébau, suku Costa, sub-rejiaun Pante Makasar ho tema, ‘Hakbiit Espíritu Desportivu Hodi Hametin Pás no Estabilidade’.
“Ha’u reprezenta Primeiru-Ministru, Kay Rala Xanana Gusmão, agradese ba komisaun organizadora no jogadór sira hotu mai husi suku 13. Ho atividade ne’e bele kria pás, estabilidade no unidade sai metin liután iha Oé-Cusse”, governante ne’e dehan iha kampu futeból Oébau, ohin.
Nia hatutan desportu ne’e atu hasa’e joven sira-nia talentu no la’ós buka atu tuku malu. “Ohin, imi hala’o jogu desportivu ida-ne’e iha Oé-Cusse. Orgullu no apresia ba imi Oé-Cusse oan, mezmu imi iha Dili buka moris no buka matenek, maibé amizade metin nafatin. Hamutuk kria unidade iha rai bo’ot ne’eba”, nia dehan.
Notísia relevante: FKTL preparadu realiza Xanana Cup iha maiu
Nia afirma liuhusi torneiru ne’e bele promove talentu no halo joga ho amizade hodi taka tinan tuan 2024 ho laran ksolok, tanba jogu ne’e nia objetivu loloos mak atu selebra loron Natál hamutuk entre Oé-Cusse oan sira iha rai-ketan ne’e.
“Ha’u husu de’it jogu halo didi’ak atu tornei Xanana Cup, maun boot Xanana labele rona fali mosu problema, ida-ne’e labele akontese”, nia husu.
Prezidente Komisaun Organizadora, Firmino Taeki, hateten tuir loloos suku 18 partisipa ho másima, maibé atividade ne’e urjente ne’ebé suku 13 de’it mak rejista.
“Jogu ikus ne’e sei fahe prémiu ba primeiru lugár ho taxa rotativa. Tinan oin sei kontinua, agora, prémiu ne’e sei fahe to’o kuartu lugar, tinan oin ita sei di’ak liután no sira ne’ebé la rejista, tinan oin bele partisipa no jogu ne’e to’o finál, primeiru-ministru mak sei enserra”, nia dehan.
Iha biban ne’e, Komandante PNTL Oé-Cusse, Superintendente Polísia Nicolau Francelino da Costa, apela ba jogadór hotu atu hatudu respeitu ba malu, nune’e torneiu ne’e bele la’o ho susesu to’o rohan.
“Jogu ne’e importante atu hametin relasaun nu’udar Oé-Cusse oan no hametin espíritu desportivu nian. Buat ida manán ka lakon ne’e normál, importante mak hatudu jogu, ha’u lakohi durante jogu ne’e la’o imi tuku malu no problema. Se akontese iha jogu kontinua, sei hasoru ho polísia, tanba ema barak hakarak mai haree imi-nia jogu la’ós haree fali problema”, nia fó hanoin.
Notísia relevante: Xanana kongratula jogu futsál Peace Cup juventude g7⁺ iha Portugal
Suku sira ne’ebé partisipa jogu ne’e mak Abani, Malelat, Bobometo, Bene-Ufe, Ban-Afi, Lela-Ufe, Costa, Cunha, Lalisuk, Naimeko, Bobokase, Taiboko no Nípani. Enkuantu suku lima ne’ebé la konsege rejista mak Usitasa’e, Usitaqueno, Usitako, Suni-Ufe no Lifau.
Jornalista: Abílio Elo Nini
Editora: Maria Auxiliadora
