DILI, 14 dezembru 2024 (TATOLI)—St. Anthonys International School (SAIS), sábadu ne’e, realiza serimónia graduasaun ba dahitu, ba estudante Primária no Pré-Sekundária.
Prezidente Repúblika (PR), José Ramos Horta, ne’ebé partisipa serimónia ne’e, apresia ho inisiativa husi fundadór eskola tanba bele harii ona eskola ne’ebé ho kualidade.
“Ha’u mai bebeik iha eskola ne’e, ohin ha’u mai asiste sira-nia graduasaun ba dahitu nian, eskola ne’e timoroan ki’ak ida mak harii eskola ida ho lian inglés ho kualidade, iha tinan hira nia laran, ha’u mós buka meiu hotu atu apoiu eskola ne’e, buka mós dalan atu fó bolsa estudu ba estudante sira, apresia ho timoroan ida-ne’ebé loke eskola ne’e,” PR Horta hateten iha salaun eskola Palapaço.
Notísia relevante : Empreza Haumeni-Aisaf entrega mobiliáriu eskolár ba Edukasaun Oé-Cusse
Xefe Estadu nota, eskola ne’e laiha ema boot ruma mak fó apoiu no fundadór na’in-ida de’it, maibé durante tinan barak eskola nia progresu di’ak tebes.
Iha fatin hanesan, Fundadór SAIS, Cesár Dias Quintas, informa, ohin estudante hamutuk na’in-16 mak gradua.
“Ohin ita fó graduasaun ba estudante na’in-16, sira ne’e hanesan Indonézia nian karik SD ba SMP no SMP ba SMA. Ami-nia eskola to’o de’it SMP, SMA sira tenke ba buka fali eskola seluk, iha ne’e ami-nia kurríkulu adapta husi Austrália nian,” Cesár hato’o.
Nia haktuir, nia rasik mak harii eskola ne’e, ne’ebé durante ezisténsia konsege hasoru dezafiu lubun maibé la hamate nia espíritu atu kontinua hakat ba oin.
“Eskola ne’e ita timoroan mak harii, hasoru dezafiu oin-oin, maibé ita nafatin hamriik hodi kontribui ba dezenvolvimentu iha setór edukasaun,” nia tenik.
Tuir dadus estudante hamutuk 208 husi Pre-Eskolár to’o Pré-Sekundária mak frekuenta hela estudu iha eskola ne’e.
Eskola ne’e maioria profesór mai husi Filipina inklui timoroan balun, propina mensál ba kada estudante $125 seidauk inklui administrasaun no seluk tan.
Jornalista : Hortencio Sanchez
Editora : Julia Chatarina
