iklan

EKONOMIA, HEADLINE

Governu prevee implementasaun rejime tranzitória ba Fundu Espesiál Dezenvolvimentu

Governu prevee implementasaun rejime tranzitória ba Fundu Espesiál Dezenvolvimentu

ADN orienta ona kompañia PT. Waskita Karya sobu ona estrada Ponte Noefefan ba Oénunu. Imajen Tatoli/ Abílio Elo Nini

DILI, 16 dezembru 2024 (TATOLI)Governu liuhusi reuniaun estraordinária Konsellu Ministru (KM), segunda ne’e, aprova ona projetu dekretu-lei ba alterasaun dahuluk husi dekretu-lei númeru 1/2015, loron 14 janeiru, kona-ba Fundu Espesiál ba Dezenvolvimentu.

Diploma ne’e aprezenta hosi Primeiru-Ministru, Kay Rala Xanana Gusmão, Prezidente Autoridade Rejiaun Administrativa Espesiál Oé-Cusse Ambenu (RAEOA), Rogério Tiago de Fátima Lobato, no Koordenadór Komisaun Ezekutiva ba estabelesimentu Zona Dezenvolvimentu Ekonómika Espesiál iha Oekusi Ambenu (ZEEDOA), João Mendes Gonçalves.

“Diploma ne’e prevee implementasaun rejime tranzitória ida ba Fundu Espesiál Dezenvolvimentu nian hodi fornese ba nia instrumentu jestaun no kapasidade operasionál ne’ebé permite hahú projetu prioritáriu ba dezenvolvimentu, prepara estrutura jestaun ida ne’ebé efisiente no finansia projetu estratéjiku tinan-barak ho karákter sosiál no ekonómiku,” referidu nota ne’ebé Agência Tatoli asesu hafoin reuniaun ezekutivu, iha Palásiu Governu.

Notísia relevante : Autoridade RAEOA sei reanunsia konkursu ba projetu konstrusaun estrada Noefefan-Oénunu

Objetivu husi diploma ida-ne’e mak atu adapta Fundu Espesiál Dezenvolvimentu RAEOA, tuir dispozisaun foun lei númeru 18/2023, iha loron 30 novembru, ne’ebé halakon Zona Espesiál Ekonomia Sosiál Merkadu Oé-cusse Ambenu no Ataúro no prevee kriasaun Zona Ekonómika Espesiál foun ida define filafali atribuisaun no objetivu fundu nian, ne’ebé tutela mós hosi Primeiru-Ministru.

Aleinde ne’e, diploma ne’e inklui medida sira ho objetivu atu garante resposta ba estratéjia dezenvolvimentu ba Oé-cusse Ambenu hotu iha tempu médiu no tempu naruk, ho benefísiu reál, liu-liu ba populasaun Oé-cusse no Timor-Leste ein jerál.

Jornalista     : Arminda Fonseca

Editora          : Julia Chatarina

iklan
iklan

Leave a Reply

iklan
error: Content is protected !!