OÉ-CUSSE, 06 Dezembru 2024 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) sei fó sai fali, iha tempu badak, konkursu ba projetu konstrusaun estrada hahú husi ponte Noefefan bá to’o Oénunu, iha suku Suni-Ufe, sub-rejiaun Nítibe.
“Ita hakotu ona kontratu ho Waskita Karya, maibé tempu badak ita sei loke prosesu fali ba empreza foun sira-ne’ebé iha atu kontinua estrada ida-ne’e ba oin”, Prezidente RAEOA, Rogério Lobato, informa iha Oé-Cusse, ohin.
Nia salienta katak autoridade seidauk fó sai ba públiku atu loke ba empreza timoroan ka rai-li’ur, maibé prosesu tomak sei liuhusi aprovizionamentu.
Notísia relevelante: ADN sobu ona projetu estrada husi ponte Noefefan-Oenunu
“Iha konkursu mak ita haree. Ha’u labele ko’alia lai atu fó prioridade ba timoroan ka la’e? Tanba orsida mosu konflitu interese, maibé sei liuhusi aprovizionamentu para hothotu la’o tuir lei. Ida-ne’ebé sai manán-na’in, nia mak sei kontinua estrada ne’e”, nia hateten.
Hodi adianta katak autoridade halo ona pagamentu 50% ba empreza konstrutora bazeia ba progresu serbisu, ne’ebé daudaun ne’e atinje ona 46%.
“Ita selu ona estrada ne’e liu tiha ona 50%, tanba estrada ne’e ki’ik hela, maibé osan boot tebes millaun $23. La to’o kilómetru 12, maibé osan liu tiha, agora nia progresu fíziku foin mak atinje de’it 46%”, salienta.
Notísia relevelante: Utilizasaun materiál ba konstrusaun estrada Noefefan-Oénunu la tuir BoQ
Rekorde katak konstrusaun estrada husi ponte Noefefan bá Oénunu ne’e Ajénsia Dezenvolvimentu Nasionál (ADN) no Diresaun Rejionál Infraestrutura (DRI) deside hodi sobu tiha kilómentru neen, inklui asfáltika kilómetru tolu tanba nia base course la tuir espesifikasaun.
Estrada pakote primeiru husi ponte Noefefan bá to’o Oénunu ne’e autoridade RAEOA hatuur fatuk dahuluk iha loron 19 Agostu 2022 no PT. Waskita Karya mak ezekuta obra ne’e ho distánsia kilómetru 11 ho montante millaun $23.
Notísia relevelante:Rogério Lobato preokupa projetu estrada Tono ba Oésilo gasta millaun 33-resin
Jornalista: Abílio Elo Nini
Editora: Maria Auxiliadora
